Pa mbushur ende 72 orë nga krijimi, Super Liga u braktis nga shumica e klubeve nismëtare, të cilat në harkun e pak orëve konfirmuan me deklarata zyrtare se vendosën të tërhiqen nga ideja e krijimit të këtij kompeticioni.
Së fundi ka reaguar me një deklaratë edhe klubi i Milanit, ka pranuar se zëri i tifozëve do të dëgjohet dhe merret në konsideratë, por ka theksuar se ndryshimi është i nevojshëm, duke konfirmuar angazhimin për një projekt edhe më ambicioz.
Ja deklarata e klubit kuqezi:
Ne pranuam ftesën për të marrë pjesë në projektin Super League me qëllimin e mirëfilltë për të krijuar kompeticionin më të mirë të mundshëm evropian për tifozët nga e gjithë bota, për të mbrojtur interesat e Klubit dhe mbështetësve tanë.
Ndryshimi nuk është i lehtë, por evolucioni është i domosdoshëm për të përparuar dhe struktura e futbollit evropian gjithashtu ka evoluar dhe ndryshuar me kalimin e viteve.
Por zërat dhe shqetësimet e tifozëve në të gjithë botën në lidhje me projektin e Superligës kanë qenë të forta dhe të qarta, dhe klubi ynë duhet të mbetet i ndjeshëm dhe i vëmendshëm ndaj mendimit të atyre që e duan këtë sport të mrekullueshëm.
Sidoqoftë, ne do të vazhdojmë të punojmë në mënyrë aktive për të përcaktuar një model të qëndrueshëm për botën e futbollit.
