Martini: Gjysma e së keqes që dolëm barazim me Vllazninë

Futboll

Martini: Gjysma e së keqes që dolëm barazim me Vllazninë

Më: 7 maj 2021 Në ora: 11:48
Martini: Gjysma e së keqes që dolëm barazim me Vllazninë

Teuta pret nesër në shtëpi Bylisin, në një takim ku duhet të kthehet te fitorja pas barazimit të fundit me Vllazninë. Në konferencë për shtyp, trajneri i durrsakëve, Edi Martini ceku edhe ndeshjen me shkodranët ku theksoi se nuk ishte keq që dolën me një pikë, ndërsa thekson se ekipi i tij është pretendenti kryesor për titull.

Ndeshja me Vllazninë- “Në pjesën e parë u ruajtëm. Duke parë kualitetet e Vllaznisë dhe mënyrën se si luajnë ata, qëndruam pak në mbrojtje. Në pjesën e dytë kërkuam të dilnim përpara, por nuk arritëm të shkonim te porta ashtu siç donim.

Prishëm aksionet e Vllaznisë, qarkulluam topin, pavarësisht se bëmë shumë gabime, sidomos te pasimet. Në këto momente janë shumë të rëndësishme pikët, është shumë e rëndësishme ana psikologjike e lojtarëve. Një humbje do na bënte shumë dëm, kështu që gjysmë e së keqes ishte barazimi”.

Bylis? “Nuk ka ndeshje të lehta, ata luajnë për të mos dalë nga kategoria, ndërsa ne luajmë për të dalë kampionë. E shoh si një ndeshje që duhet fituar, por duhet të kemi kujdes. Jemi mirë, gjendja fizike e lojtarëve është e mirë, duke përjashtuar kapitenin Arapi.

Ai ka një dëmtim në pulpë, shpresojmë ta kemi për ndeshjen tjetër. Pjesa tjetër është ok, gjendja e grupit është e mirë, kështu që them se jemi në nivel mjaft të mirë.

Presioni i fitores? Çdo ndeshje ka vështirësitë e veta, por kjo nuk përbën problem për ne, sepse ne çdo ndeshje e kemi për ta fituar. Është një ndeshje e fortë, Bylis kërkon të marrë diçka nga kjo ndeshje. Ne do të bëjmë ndeshjen tonë, do të futemi në fushë për fitore.

Ekipi ka luajtur mjaft mirë në fazën e mbrojtëse, kemi presuar shumë lart, nuk kemi lënë ekipet të organizojnë lojën e tyre. Disa shprehen se Teuta ka mbrojtje të fortë sepse luan në mbrojtje, por jo. Ne kemi mbrojtje të fortë sepse presojmë lart, nuk lejojmë ekipet të na afrohen te porta.

Shanset për titull? Shanset janë të mëdha, duke parë nivelin e lojës që kemi treguar gjatë ndeshjeve. Unë them që jemi pretendentët kryesorë për të fituar titullin“, u shpreh Martini.

commentFirst article
Sot mund të lexoni Shfletoni kopertinat