Nja nga lëvizjet më të bujshme të merkatos së verës së kaluar ishte shkëmbimi Pjaniç-Arthur. Barcelona mendoi se me afrimin e boshnjakut do të garantonte më tepër cilësi në mesfushë, ndërsa Juventusi besoi se braziliani, më i ri në moshë, do t’i jepte më shumë ritëm dhe fleksibilitet lojës sidomos në fazën sulmuese.
Përfundimi? Një lëvizje e dështuar që nuk ndihmoi as “blaugranat”, as bardhezinjtë.
Por nga Spanja vjen një propozim vërtet i bujshëm, pikërisht nga “Radio Catalunya”, përmes fjalëve të Gerard Romero, një gazetar që është gjithmonë shumë i informuar për ngjarjet e klubit katalan. Ai tregon se mes dy klubeve kanë vijuar kontaktet, por me një ndryshim: në tryezën e bisedimeve janë emrat e dy lojtarëve, të Rodrigo Bentancur dhe Miralem Pjaniçit.
Bëhet fjalë për të njëjtën mënyrë transferimi, pra shkëmbim lojtarësh. Uruguaiani do të bashkohej me katalanët ndërsa boshnjaku do të kthehej te Zonja e Vjetër pas vetëm një viti me ngjyrat “blaugrana”.
Pjanic duket se nuk ka më vend te Barça. Trajneri Koeman po u beson lojtarëve të akademisë. Klubi është vënë në lëvizje tashmë për t’i gjetur një destinacion të ri 31-vjeçarit.
Të dy klubet, përsëri sipas medieve spanjolle, i kanë lënë dyert e tyre të hapura në përpjekje për ta përfunduar marrëveshjen për një shkëmbim të ri.
