Maqedonia e Veriut ka marrë sot humbjen e dytë në debutimin historik në një Kampionat Europian.
Sytë e shqiptarëve kanë qenë të drejtuar edhe nga fqinjët lindorë këtë vit, teksa në organikën e tyre janë edhe lojtarë shqiptarë.
Zekirja Ramadani thekson se Maqedonia ka fituar shumë tifozë shqiptarë prej këtij fakti, ndërsa sa i përket aventurës së deritanishme shprehet për “Sport Magazine” në “Ora Neës” se ishte e mjaftueshme pjesëmarrja në një event të këtyre përmasave.
“Mendoj se vetëm pjesëmarrja në këtë kampionat ishte e mjaftueshme. Besoj se nëse marrim pjesë në kampionatin e ardhshëm evropian do të përmirësojmë shumë gjëra. Kjo kombëtare ka futbollist mjaft cilësorë. Futbollistët shqiptarë treguan se kanë kualitet, sot edhe Bardhi nuk ishte në formën e duhur për shkak se kishte kaluar virusin.
Mungesa më e madhe tek kjo skuadër ishte eksperienca. Këtë vit Maqedonia ka fituar shumë tifozë shqiptarë“, është shprehur Zekirja Ramadani.
