Keita Balde drejt rikthimit te Interi. Pasi veshi fanellën zikaltër në sezonin 2018-2019, i ardhur në huazim nga Monaco dhe shënoi edhe golin vendimtar që kualifikoi Interin në Champions, sulmuesi senegalez duket se do të rikthehet sërish në Milano.
Futbollisti është rritur te të rinjtë e Lazios nën urdhrat e Simone Inzaghit dhe ishte pikërisht ky i fundit që e lancoi në Serinë A me bardhekaltrit, ndërsa tani të dy mund të bashkohen sërish, por këtë herë te Interi.
Sezonin që lamë pas Keita ishte në huazim te Sampdoria, por nuk dëshiron të qëndrojë më aty dhe pak ditë më parë ka takuar Simone Inzaghin në Carpi, ku të dy janë me pushime dhe i ka kërkuar që ta marrë me vete te Interi.
Nën drejtimin e Inzaghit, Keita ka regjistruar edhe sezonin më të mirë të karrierës, ndërsa mësohet se trajneri ka kontaktuar drejtuesit e Interit, për t’u sugjeruar të marrin në konsideratë senegalezin, si alternativë për sulmin.
Keita Balde mund të luajë shumë miri qoftë në krah të Lukakut, qoftë si sulmues i parë në krah të Lautaros apo Sanchez, ndërsa Inter mund ta blejë kartonin e tij për një shifër jo më të lartë se 5 milionë euro, ndaj drejtuesit po e studiojnë me kujdes këtë mundësi.
