Lajmet për të ardhmen e Paul Pogba kthehen përsëri në modë. Mesfushori francez hyn në vitin e tij të fundit të kontratës me Manchester United dhe tashmë ka dy super konkurrentë në derë.
Gazeta spanjolle “AS” raporton se për ish-mesfushorin e Juventusit mund të ketë një betejë të fortë mes Real Madridit dhe PSG. Duhet përmendur se qëllimi kryesor i francezit do të ishte veshja e fanellës së bardhë, klub me të cilin dëshiron të bashkohet prej vitesh.
Tabloidi anglez “Daily Star” konfirmon se Pogba ka vendosur të mos e rinovojë kontratën me “Djajtë e Kuq” dhe të nënshkruajë në korrik 2022 me Real Madridin falas.
“Sky Sport Uk” në vend të kësaj shpjegoi se PSG ka vendosur tashmë që verën e ardhshme të afrojë dy lojtarë jashtë kontratës: Cristiano Ronaldo dhe Pogba, me sigurinë për t’i ofruar mesfushorit një kontratë më substanciale sesa “Los Blancos”.
Për më tepër, PSG dëshiron një simbol francez në skuadër dhe Pogba do të ishte lojtari ideal për këtë; një element tjetër që Leonardo, drejtori sportiv, mund ta përdorte në avantazhin e imazhit të tij si menaxher i suksesshëm.
