Klubi parisien kërcënon se do ta padisë në FIFA, Barcelonën.
Afati kalimtar i verës në Spanjë dhe në Francë ende nuk është mbyllur dhe klube si Barcelona apo Paris Saint-Germain po mundohen t’i shfrytëzojnë në maksimum ditët e fundit që kanë mbetur.
Klubi i Barçës është prej kohësh në kërkim të një mesfushori dhe si objektiv kryesor ka pasur yllin e PSG, Adrien Rabiot.
Barcelona nuk po i ndahet qëllimit të saj dhe për këtë janë shqetësuar shumë pala parisiene të cilët kërcënojnë t’i padisin në FIFA.
Sipas të përditshmes katalanase Sport, PSG pretendon se nga klubi i Barcelonës, kanë kontaktuar direkt me mesfushorin, pa marrë lejen e klubit.
Ekipi blaugrana po kërkon ta shfrytëzojë mundësinë, kur lojtarit i kanë mbetur edhe gjashtë muaj në kontratë dhe Rabiot deri më tani nuk ka pranuar të vazhdojë kontratën me kampionin francez.
