Sulmuesi i Real Madridit, Gareth Bale ka marrë një gjobë prej 337 mijë eurosh nga autoritetet tatimore të Spanjës për shmangie të taksave nga të ardhurat e të drejtave të imazhit.
“El Mundo” ka raportuar se gjoba ka të bëjë me një incident të vitit 2013, vit në të cilin u transferua te Real Madridi nga skuadra e Tottenhamit.
Bale atë vit nuk i ka deklaruar të hyrat nga të drejtat e imazhit dhe për këtë arsye tash duhet ta paguajë gjobën, në të cilën është përfshirë edhe interesi i përgjithshëm. Kohët e fundit, një numër i madh i futbollistëve kanë marrë gjoba nga autoritetet tatimore të Spanjës për shkak se nuk kanë deklaruar në mënyrë korrekte të ardhurat nga reklamat. Më herët janë gjobitur edhe Cristiano Ronaldo e Lionel Messi.