Ter Stegen tashmë konsiderohet një nga më të mirët në pozitën e tij, në botën e futbollit. Megjithatë ai kishte vështirësi të bënte vendin e tij në “Camp Nou”.
Gjermani ka bërë të ditur se ai kishte konsideruar largimin nga Barcelona, në sfidën e tij ndaj Claudio Bravo, për një vend në formacionin startues të katalunasve.
Reprezentuesi i Gjermanisë kaloi në Kataluni gjatë vitit 2014, pasi provoi vetën në Borussia Monchengladbach.
Sezoni i tij i parë me Barcën nuk i solli paraqitje në La Liga, duke lënë gjurmë vetëm në Copa del Rey dhe në Champions League.
26 vjeçari ka thënë se atë kohë ai konsideronte largimin e mundshëm nga “blaugranët”.
“Ishte një situatë që nuk harrohet. Për një njeri si unë që dua të luaj gjithmonë ishte situatë e komplikuar. Gara me Claudion nuk ishte e lehtë” ka thënë Ter Stegen.
“Nuk e mohoj se kishte kohë kur mendoja ta ndërroja skuadrën. Në skuadër thonin: Mos u shqetëso Marc, ti ke besimin tonë, do të jesh këtu për shumë vite, besojmë në performancën tënde. Por, pastaj shihje se realiteti nuk ishte ashtu” ka vazhduar gjermani.
“Pasi Bravo u largua, situata u kthye në favorin tim” ka përfunduar ai.
Duket se vendimi i Barcelonës për të zgjedhur Ter Stegen ishte i duhur. Pritjet e tij në ndeshjet e fundit janë të jashtëzakonshme.
