Arsenal dhe Liverpool kanë dhuruar spektakël në barazimin 1-1 në Emirates. Ishte një ndeshje tepër argëtuese për javën e 11-të të Premier League dhe barazimi ka qenë rezultati më i drejtë. Liverpool merr kryesimin e përkohshëm të renditjes, por një fitore e Man City-t nesër do t’i zbriste në vend të dytë. Ndërsa Arsenal mund të humbasë vendin e katërt që sot nëse Tottenham mposht Wolves në mbrëmje.
Sfida ishte emocionuese dhe e hapur që në fillim. Skuadrat mundoheshin të dilnin përpara me shumë forca dhe mundësitë për gol ishin të shumta. Në minutat e para Arsenal rrezikon dy herë portën e Alisson me Lacazette dhe Xhaka, përpara se Liverpool të kundërpërgjigjet me Mane dhe Van Dijk.
Por goli që zhbllokoi rezultatin erdhi pas pushimit. Në minutën e 61’ Leno gabon me daljen e tij duke dërguar topin në këmbët e Milner i cili shënon golin e 50-të të karrierës në Emirates. Arsenal mundohet të reagojë menjëherë dhe pas disa mundësive, Lacazette bën një gol fantastik në minutën e 82’.
Sulmuesi francez driblon Alisson, kthehet dhe godet duke dërguar topin në rrjetë. Minutat e fundit janë intensive teksa skuadrat kërkojnë golin e fitores duke rrezikuar shpeshherë të pësojnë golin e nokautit. Por edhe pas pesë minutave shtesë rezultati mbeti i njëjti në një ndeshje ku ka vetëm një fitues…spektakli
