Sulmuesi nga Bregu i Fildishtë ka vendosur të largohet nga futbolli i luajtur.
Didier Drogba ish-sulmuesi i Chelseat ka bërë publike tërheqjen e tij nga futbolli i luajtur.
40-vjeçari ka shënuar 164 gola në 381 ndeshje për Chelsean, duke fituar katër herë titullin në Angli dhe duke u shpallur kampion i Evropës në 2012, ku kontributi i tij ishte i jashtëzakonshëm.
Gjithashtu, sulmuesi ka fituar katër herë Kupën FA dhe tre herë Kupën e Ligës, gjatë kohës që ka luajtur në Angli.
Kohët e fundit Drogba ka luajtur në Amerikë, për Phoenix Rising, klub i divizionit të dytë, ku Drogba është bashkë pronar.
Tërheqja e Drogba ishte paralajmëruar prej kohësh dhe që në fillim të muajit u fol për vendimin e marrë, por tashmë sulmuesi i jep fund zyrtarisht, me një postim në rrjetet sociale, ku shfaqet sulmuesi kur ishte shumë i ri në moshë.
“Kur mendoj për 20 vitet e fundit të karrierës sime profesionale, duke parë këtë fotografi ndihem më krenar se kurrë për ato që kam arritur si futbollit, por mbi të gjitha si më ka formuar si njeri ky udhëtim”, tha ai. “Nëse dikush të thotë se ëndrrat e tua janë tepër të mëdha, thjesht falënderoje dhe puno edhe më shumë, duke u treguar i zgjuar, për t’i kthyer ëndrrat në realitet.
“Falënderoj lojtarët, trajnerët, klubet dhe tifozët që ma kanë bërë këtë udhëtim kaq të këndshëm. Një faleminderit shumë të madhe dhe shumë dashuri për familjen time, skuadrën time personale që më ka mbështetur pa kushte gjatë gjithë karrierës. Uroj që Zoti të më bekojë po aq shumë për të ardhmen, sa ka bërë për karrierën time futbollistike”.
