Real Madrid ka mposhtur 2-0 Valencia-n në “Santiago Bernabeu”.
Ishte një sfidë e kontrolluar nga Los Blancos ë cilët mund ta kishin zgjidhur më herët, por në fund morën tre pikë shumë të rëndësishme dhe tani presin rezultatin e ekipeve të tjera që luajnë të dielën.
Gareth Bale nuk ka arritur të shënojë në 10 ndeshjet e fundit me Real (793 minuta pa shënuar), një rekord negativ i uellsianit.
Real bën një start të shkëlqyer të ndeshjes dhe arrin të kalojë në avantazh që në minutën 8’.
Me shumë fat krosi i Carvajal devijohet nga Daniel Wass i cili e shtyn në rrjetën e tij. Në minutën e 29’ ishte Gareth Bale ai që mund të kishte dyfishuar rezultatin, por goditja e tij pritet nga Neto.
Vendasit arrijnë të dominojnë lojën duke mos e lejuar Valencia-n të tregohet e rrezikshme në zonën e tyre, por nuk arrijnë të shfrytëzojnë më së mirë mbajtjen e topit teksa shumica e rasteve të Real Madrid nuk e shqetësojnë portierin mik.
Pas pushimit Valencia regjistron mundësinë e parë serioze drejt portës madrilene, por goditja e Mina përfundon vetëm pak centimetra sipër traversës.
Një tjetër mundësi erdhi në minutën e 65’ për miqtë, por edhe këtë herë goditja e Gabriel përfundon jashtë portës.
Në minutën e 73’ Asensio ka mundësinë më të mirë për vendasit në pjesën e dytë, por goditja e tij pritet nuk shkon në portë.
Në minutën e 84’ erdhi goli i nokautit. Ishte Lucas Vazquez ai që dërgoi topin në rrjetë pas pasimit të Benzema.