Neymar përgjithmonë tek PSG?

Futboll

Neymar përgjithmonë tek PSG?

Më: 12 dhjetor 2018 Në ora: 00:23
Neymar 

Neymar ka nënshkruar një kontratë të re shumë të rëndësishme me Bankën Kombëtare të Katarit që shuan në këtë mënyrë shpresat e klubeve elitare si Real Madrid apo dhe Barcelona për një rikthim të mundshëm të tij në Spanjë.

Ylli i organikës së PSG, klub i cili është në pronësi të familjes mbretërore të Katarit i kushtoi atyre jo më pak se sa shifra e çmendur e 200 milionë paundeve gjatë transferimit të tij nga katalanët në Paris, verën e 2017-ës. Por edhe një shifër e madhe si kjo që çmendi tregun e futbollit nuk ka ndalur spekulimet e njëpasnjëshme që  lidhin të ardhmen e tij sërish me një rikthim në Spanjë, konkretisht tek Barca apo rivalët e tyre historikë madrilenët.

Këta të fundit kanë tentuar prej gati një viti operacionin e kalimit të tij në Santiago Bernabeu por deri më tani kanë dështuar. Si për të evituar çdo tentativë tjetër në drejtim të sulmuesit brazilian shërbimet e të cilit lakmohen nga shumë, tashmë klubi kryeqytetas dhe 26-vjeçari janë lidhur ngushtë më njëri tjetrin me nënshkrimin nga ana e sulmuesit të  kontratës me Bankën Kombëtare të Katarit që është kthyer në ambasadorin e tyre global.

Kjo pasi marrëveshja e re garanton se të drejtat ekskluzive të  imazhit të Neymar janë nën kontrollin e kësaj banke çka bën gati të pamundur blerjen e tij. Për të zyrtarizuar këtë marrëveshje Banka Kombëtare e Katarit ka shpërndarë një komunikatë zyrtare për shtyp në të cilën argumenton:

“Marrëveshja e re mes palëve i garanton Bankës të drejtat ekskluzive të imazhit të Neymar si një ambasador i kësaj marke, për të gjitha fushatat publicitare apo atyre të platformave në të cilat do të shfaqet. Partneriteti me Neymar Jr ka për qëllim të reflektojë vlerat e Bankës Kombëtare të Katarit, e cila është e përkushtuar dhe punon me pasion  për t’i garantuar komunitetit të klientëve të saj në të gjithë botën produktet më të mira dhe ofertat më të mira financiare duke dashur të konkretizojë vizionin e saj për t’u shtrirë dhe forcuar në bankën lidere të Lindjes së Mesme, Afrikës dhe Azisë Juglindore deri në vitin 2020. Neymar Jr është përzgjedhja më e fundit e kësaj banke duke dashur të motivojë të gjithë klientët anë e mbanë botës për të ruajtur dhe arritur ëndrrat e tyre nëpërmjet imazhit frymëzues të një lojtari të jashtëzakonshëm si ai.”

Duke i’u referuar komunikatës së bankës kujtojmë se Neymar është një ndër personat me më influencë në rrjetet sociale me 209 milionë ndjekës.

commentFirst article
Sot mund të lexoni Shfletoni kopertinat