Autostrada e Dukagjinit mbi 1 miliard euro

Gjakova

Autostrada e Dukagjinit mbi 1 miliard euro

Më: 15 janar 2019 Në ora: 14:26
Pamje nga takimi

(E plotësuar) - Kryetari i Komunës së Gjakovës Ardian Gjini, bashkë me ministrin e Infrastrukturës, Pal Lekaj, morën pjesë në dëgjimin publik me qytetarët e Gjakovës, për autostradën e Dukagjinit.

Me këtë rast, kreu i Komunës së Gjakovës Ardian Gjini ka thënë se autostrada që lidh Dukagjinin është investimi më i madh infrastrukturor në Kosovë që nga pas lufta.

Ai ka treguar edhe për tri kyçje që do t’i ketë Gjakova në këtë autostradë.

Gjini: Autostrada do të ketë tri kyçje në Gjakovë

“Një kyçje është te Skivjani, e cila e lidh Rekën e mirë, por edhe Rekën e Keqe. Kyçja tjetër është në Qerim që do të jetë një prej nyjave më të mëdha në Kosovë për shkak se aty do të kyçen Gjakova, aeroporti dhe zona ekonomike amerikane dhe qendra e qytetit dhe e treta do të jetë në Rezina, në atë pjesë mund të lidhen një pjesë e Dushkajës dhe një pjesë e Hasit”, deklaroi Gjini.

Ndërsa, ministri i Infrastrukturës Pal Lekaj ka thënë se ka ardhur koha që përmes investimeve kapitale t’i kthehet dinjiteti Gjakovës me një investim të tillë po bëhet realitet nga ministria e Infrastrukturës me mbështetjen e plotë të qeverisë Haradinaj.

Ai ka thënë se ky investim paraqet autostradën më të gjatë në Kosovë që ende jo zyrtarisht quhet autostrada e Dukagjinit. Kjo autostradë përfshinë komunat nga Istogu deri në Prizren, duke përshkruar Pejën, Deçanin, Junikun, Gjakovën, Rahovecin dhe lidhet me autostradën Ibrahim Rugova.

Sipas tij, ky projekt është më gjigandi dhe më atraktivi që po realizohet nga Qeveria Haradinaj dhe se ky projekt do të realizohet me buxhetin e shtetit pa huamarrje. Gjatësia e autostradës do të jetë mes 90-95 km me të gjitha elementet përcjellëse.

Lekaj: Autostrada është projekti më gjigant në Kosovë

“Ndër projektet që i gëzohemi është ky projekt. E them pa politikë, por si qytetarë i këtij vendi. E them që ky projekt është më gjigant që ka ndodhur në Kosovë dhe më atraktiv që do të ketë impakt pozitiv edhe për bizneset, për zhvillim, turizëm dhe gjithë sektorët”, ka thënë Lekaj.

Ai ka shtuar se vlera e përafërt e këtij projekti do të sillet rreth 590 milionë euro, kurse me shpronësime rreth 1 miliard euro, me financim të ndarë në katër vite qeverisje.

Gjakova do t’i ketë 3 hyrje-dalje në këtë autostradë, kurse qasja më e afërt e Gjakovës do të jetë në distancë prej 4.1 kilometra.

Hasan Berisha, qytetar, ka propozuar që autostrada të ketë trasenë nëpër tokat shoqërore.

Berisha: Traseja e autostradës të shfrytëzojë edhe tokat që i ka në dispozicion

“Traseja e autostradës të shfrytëzojë edhe tokat që i ka në dispozicion shteti apo komuna dhe të jetë më afër lumenjve”, ka thënë Berisha.

Kryetari Gjini dhe ministri Lekaj i siguruan banorët e kësaj komune se ky projekt do të realizohet konform interesit të tyre dhe se çdo shqetësim, sugjerim apo vërejtje e tyre në këtë debat do të merret parasysh, do të analizohet dhe nëse është kompatibil me projektin do të inkorporohet në të. Ndërsa përfaqësuesi i kompanisë ‘Infra’, e cila do të merret me projektin e autostradës, ka folur për elementet e kësaj auto-rruge.

Lekaj: Autostradën e Dukagjinit projekti më gjigand që po bëhet

Ministri i Infrastrukturës dhe Transportit, Pal Lekaj, bashkë me kryetarin e Gjakovës, të martën morën pjesë në dëgjimin publik me qytetarët e Gjakovës, për autostradën e Dukagjinit.

Ministri Lekaj i siguroi banorët e kësaj komune se ky projekt do të realizohet konform interesit të tyre dhe se çdo shqetësim, sugjerim apo vërejtje e tyre në këtë debat do të merret parasysh, do të analizohet dhe nëse është kompatibil me projektin do të inkorporohet në të.

Ai tha se ky projekt është më gjigandi dhe më atraktivi që po realizohet nga Qeveria Haradinaj dhe se ky projekt do të realizohet me buxhetin e shtetit pa huamarrje. Vlera e përafërt e këtij projekti do të sillet rreth 590 milionë euro, kurse me shpronësime rreth 1 miliard euro, me financim të ndarë në katër vite qeverisje. Gjakova do t’i ketë 3 hyrje-dalje në këtë autostradë, kurse qasja më e afërt e Gjakovës do të jetë në distancë prej 4.1 kilometra.

Lekaj i siguroi gjakovarët se projekti i autostradës së Dukagjinit do të realizohet sipas kritereve dhe standardeve më të larta, duke i respektuar të gjitha parametrat e autostradave më moderne të Evropës.

Pas prezantimit të projektit nga kompania projektuese qytetarët e Gjakovës falënderuan ministrin Lekaj dhe Qeverinë e Kosovës, për këtë projekt madhor për Dukagjinin dhe dhanë komentet e tyre lidhur me të, duke kërkuar që autostrada të bëhet sa më afër qytetit të Gjakovës që t’u mundësojë atyre qasje më të lehtë në të.

Gjatë muajit janar ministri i MIT, Pal Lekaj, do të merr pjesë në dëgjimet publike me qytetarë për autostradën e Dukagjinit, në komunat nga do të kalojë ky projekt. Komunat ku do të mbahen dëgjime publike për autostradën e Dukagjinit janë: Rahoveci, Juniku, Deçani, Peja, Istogu dhe Prizreni.

commentFirst article
Më të lexuarat
Sot mund të lexoni Shfletoni kopertinat