Kosova u trondit mbrëmjen e 7 gushtit të vitit të kaluar kur Pjetër Nrecaj vrau me armë zjarri gruan dhe vajzën e tij 9-vjeçare në fshatin Brekoc të Gjakovës, derisa po qëndronin në shtëpinë e vëllezërve së bashku me fëmijët. 40 vjeçari, Nrecaj e pranoi krimin para trupit gjykues, e për atë vepër e armë mbajtje pa leje u dënua me 25 vite burg. Kjo deri mëngjesin e sotëm, kur Gjykata e Apelit mori vendim për ndryshim të kësaj mase, e i njëjti tashmë do të vuaj burgim të përjetshëm.
Valbona Marku Nrecaj kishte duruar për shumë vite dhunën nga bashkëshorti i saj, Pjetri, deri në gushtin e vitit të kaluar kur ajo do të vendoste të ikte në shtëpi të vëllezërve.
Veprimi i asaj acaroi edhe më shumë bashkëshortin, që në shtëpinë e vëllezërve të tashmë të ndjerës do të shkonte i armatosur e nga aty do linte të vdekura përveç gruas edhe vajzën e tij Klarën 9-vjeçare.
Se kishte kryer krimin 40-vjeçari e pranoi edhe para gjykatës, duke shtuar se gjithçka kishte ndodhur aksidentalisht, e për të njëjtën vepër ishte penduar.
Me 2 nëntor të 2018-tës, Gjykata Themelore në Gjakovë shpalli fajtor Pjetër Ndrecaj për vrasjen e dyfishtë, duke e dënuar me 23 vite për vrasje dhe 2 vite për armëmbajtje pa leje, ku i llogaritej edhe koha që e kishte kaluar në paraburgim.
Dënimi për aktin makabër u komentua shumë, e për të njëjtin rast u organizuan disa herë protesta që bënin thirrje për ndryshim të masës në burgim të përjetshëm, duke llogaritur vrasjen si një nga më të rëndat që ka ndodhur viteve të fundit.
Mëngjesin e së premtes, Gjykata e Apelit, hodhi poshtë vendimin e Gjykatës Themelore në Gjakovës, e të njëjtit ia ndryshuan masën me burg të përjetshëm duke u bazuar në peshën e rëndë të veprës penale dhe rrethanat posaçërisht rënduese.
Express gjatë ditës ka biseduar me familjarët e të ndjerës. Vëllai i Valbonës, Shkelzen Marku është deklaruar se masa që iu është caktuar kryesit të veprës nuk ia heq dhimbjen që kanë, e flet edhe për letrat që i ka lënë motra.
“Nuk është punë krenarie apo dëshire, është dhimbje e thellë për familjen, ky vendim nuk na e lehtëson dhimbjen ose pikëllimin, mirëpo sot vetëm u vendos derjtësia e limituar për vrasjen e Valbonës dhe Klarës, është e limituar pasi që nuk ka qenë vetëm natën e vrasjes dhe ky është një vendim që duhej të merrej që në fillim, duke pas parasysh drejtësinë që kemi në Kosovë nuk lë vend të komentohet shumë duke pas parasysh që në fillim kur motra e kishte denoncuar sa e sa herë dhe nuk u ndërmor asgjë”, thotë Shkëlzeni, duke u shprehur se janë në një gjendje të rëndë që në një vend ku nuk funksionon rendi e ligji,
Vëllai i Valbonës thotë se nuk kanë marrë ndihmë nga askush e madje nuk iu është ofruar as siguri e për këtë janë detyruar që të ikin nga Kosova.
“Jemi larguar nga Kosova pas dy tre muajsh që ka ndodh rasti prej fjalëve dhe rrezikshmrisë së lartë të fëmijëve dhe familjes dhe sigurisë që si ka interesuar askujt e lidhjeve që i kishin në polici, e kam pa shumë të pasigurt me i lënë familjen atje. Pas çdo përpjekje që bëja të ndihmoja fëmijët ose që familja s’ndihej e sigurt ishte e kotë të merrej dikush me ne”, deklarohet Shkëlzeni.
Ai tregon se e ndjera ka lënë edhe dëshmi të mjaftueshme që tregojnë se kishte rrezik që të çonin rastin edhe deri në vrasje.
“Motra ka lënë letër dhe ka dëshmi të mjaftueshme se pse u vra, me aq sa e di unë hetuesia i ka të gjitha në dorë, mbetet të shihet pas kësaj tragjedie nëse drejtësia në Kosovë të paktën tani do të eci si duhet pasi dëshmitë që i dha motra ime çdo ditë sa ishte gjallë sipas policisë ishin shumë të pa baza”, thotë ai.
“Pas vrasjes që ndodhi e kemi marrë vesh nga fëmijët e motrës që njana vajzë i kishte lexuar dy letra të Valbonës fshehurazi që i kishte pas në çantë por ne s’kemi gjetë asnjë letër, Valbona s’ka dashtë me rreziku familjen edhe me lanë dëshmi te ne, vajza e dëshmon se letra është shkruar nga e ëma”, thotë Shkëlzeni duke përfunduar se shpresojnë që rasti që ju ka ndodhur atyre të jetë i fundit.
Pjetër Nrecaj për vrasjen e gruas dhe vajzës është dënuar me burg të përjetshëm, e ky është dënimi më i rëndë që parashihet me Kodin Penal të Republikës së Kosovës.
Në kohën kur kishte ndodhur vrasja çifti ishin të ndarë e po jetonin në shtëpi të ndryshme, dy prej fëmijëve jetonin me të atin dhe tre me nënën.
