Akademia Përkujtimore për heroin Sali Çekaj, e organizuar nga Dega e LDK-së në Gjermani, me angazhimin logjistik të Nëndegës të saj, në Baden Würtemberg dhe shoqatat e ndryshme të Landit Baden Württemberg, u mbajt më 12 maj. Në të njejtën ditë është mbajtur edhe takimi me mërgimtarët shqiptarë i Nënkryetarit të Parlamentit europian Rainer Wieland, në shoqërim të ambasadorit Çufaj dhe konsullit Lladrovci, që të dyjat në Shtutgart. Poashtu edhe kryetari i Drenasit me konsullin Lladrovci kanë vizituar këto ditë qytetin Gerlingen, afër Shtutgartit.
Kurse në Ditarin Qendror të RTK-së këtë ditë është paraqitur vetëm aktiviteti i Nënkryetarit të PE.Të nesërmen më 13.05.19 është dhënë aktiviteti i kryetarit të Drenasit. Tek më 14.05.19 është dhënë inserti nga Akademia.
Shtrohet pyetja se në bazë të cilit kriter, me kaq vonesë prezantohet Akademia për hartuesin e Statutit të Komunës së Deçanit, sipas Kushtetutës së Kaçanikut, Nënkryetarit të LDK-së për Gjermani, themeluesit të UÇK-së, strategut të thyerjes së kufirit shqiptaro-shqiptar e Komandantit të shquar të UÇK-së heroit Sali Çekaj. Duhet cekur se për dy aktivitetet e para informoi Besart Galica, kurse për Akademinë Adriana Morina, që do të thotë se faktori kohë përjashtohet.
Në raportimin nga Akademia, gazetarja përmend të pranishmit si "shqiptarë të organizuar në shoqata nga rrethi i Shtutgartit, Mannheim, Zvicër dhe Bajern", duke anashkaluar Degën e LDK-së për Gjermani dhe Nëndegën e LDK-së për Baden Württemberg!
Gazetarja e politizuar, me sakt, e porositur, jo vetëm në Ditarin Qendror të vonuar dhe as në emisionin special, nuk e pa të arsyeshme të paraqes pjesë të fjalës të Nënkryetarit të Degës së LDK-së, aktualisht, edhe ushtrues i detyrës së kryetarit të LDK-së për Gjermani, Blerim Hajdaraj, djali i Komandantit, heroit dhe deputetit të LDK-së, Smajl Hajdaraj.
Mediumi, gjoja publik, RTK, tashmë, është dëshmuar për cenzurën selektive, kur është fjala për organizimet e LDK-së. Aq më alergjik është ky medium, kur bëhet fjalë për të vrarët politikë dhe pasardhësit e tyre. Një nismë e keqe e drejtorit të ri, Ngadhnjim Kastrati!
KRYESIA E DEGËS TË LDK-SË NË GJERMANI
