Janë ndarë sot certifikatat për 80 të rinj të cilët kanë ndjekur trajnimin “Fuqizimi i rinisë dhe rritja e pjesëmarrjes”, projekt ky bashkëpunim në mes të Komunës së Gjilanit dhe Turqisë. Aty u tha se të rinjtë të cilët nga tetori i vitit të kaluar kanë ndjekur seminaret, në të ardhmen do të jenë ndërmarrës të rinj.
Drejtoresha për Kulturë dhe Rini në Komunën e Gjilanit, Deniza Limani, tha se përmes projekteve të tilla avancohet rinia e Gjilanit.
Limani: Shpresojmë të kemi më shumë projekte për avancimin e rinisë së Gjilanit
“I falënderoj shumë për gatishmërinë e tyre dhe gjithmonë komuna e Gjilanit, respektivisht drejtoria për Kulturë, Rini dhe Sport është e gatshme që të ndihmojë dhe të bashkëpunojë me secilin prej tyre, kështu që shpresoj që herëve të tjera të kemi projekte edhe më të shumta bashkërisht në mënyrë që rinia e Gjilanit të përfitojë sa më shumë prej projekteve dhe pse jo të avancohet më shume”, tha ajo.
Ndërsa, Nedim Asllan nga Ministria e Kulturës në Turqi tha se projekti është përfunduar me sukses dhe synojnë të vazhdojnë me bashkëpunime të tilla me Kosovën.
Asllan: Projekti synon të profesionalizojë ndërmarrës të rinj
“Departamenti për diasporë turke sot në Gjilan, vëllezërve të Kosovës në Gjilan u kemi mundësuar të rinjve ndjekjen e seminareve për ndërmarrësi dhe hartimin e projekteve, ne kemi bashkëpunuar dhe kemi realizuar projektin në përpikëri. Kemi filluar në muajin tetor sot është përfundimi, sot kemi vendosur gurët e fundit duke i shpërndarë certifikatat për pjesëmarrësit. Besojmë që këta që kanë ndjekur këtë trajnim do të mund të hapin bizneset e tyre të reja. Besoj që pas përfundimit të seminareve do të jenë ndërmarrës të ri në të ardhmen. Si Qeveri e Turqisë, qoftë kemi me qenë përkrahës i të rinjve, ky ka qenë projekt shembull dhe do të vazhdojmë me projekte në të ardhmen”, tha ai.
Në këtë projekt janë aftësuar 80 të rinjë të cilët sot u pajisën me certifikata.
Para ndarjes së certifikatave, kryetari i Gjilanit, Lutfi Haziri ka pritur në takim koordinatorin nacional nga Ministria e Kulturës në Turqi, Nedim Asllan.
