Në kuadër të bashkëpunimit që ka Komuna e Gjilanit me Policinë e Kosovës, sot në Ndërmarrjen Komunale “Stacioni i Autobusëve” është bërë hapja e zyrës për prezencën e policisë, me qëllim të rritjes së sigurisë publike, kujdesit ndaj udhëtarëve dhe operatorëve.
“Është ndërmarrje në të cilën marrin shërbimet e tyre 15 mijë udhëtarë brenda ditës dhe prezenca e policisë është e domosdoshme. Gjithashtu, nga dita e djeshme ka hyrë në fuqi udhëzimi administrative i cili sanksionon ndaljet e autobusëve dhe operatorëve të tjerë në vende të paautorizuara dhe gjobat mandatore janë shumë të larta, për çka apelojmë operatorët që të jenë vigjilent dhe të zbatojnë ligjin dhe rregullat e komunikacionit”, ka thënë kryetari i Gjilanit, Lutfi Haziri, në ceremoninë e hapjes së kësaj zyre.
Haziri ka konfirmuar se në ndërmarrjen publike “Stacioni i Autobusëve”, do të vazhdohet me investime dhe njëkohësisht tha se pret certifikimin e stacionit sipas udhëzimeve ligjore.
Alban Ramushi, komandant i Stacionit Policor në Gjilan, ka falënderuar kryetarin e Komunës për bashkëpunimin dhe mbështetjen që i ka dhënë policisë që të jetë më afër qytetarëve sikur në rastin e sotëm ku fluksi i tyre brenda ditës është shumë i madh.
“Lusim të gjithë operatorët që t’i përmbahen rregullave të Stacionit të Autobusëve dhe njëkohësisht të zbatojnë edhe udhëzimin administrativ për qarkullimin në komunikacion, që ka hyrë në fuqi nga data 1 nëntor 2018, sepse në të kundërtën duhet të veprohet në përputhje me këtë udhëzim”, ka potencuar ai.
