Ambasadori i Shqipërisë në Shkup, Fatos Reka dhe konsulli i nderit Imer Selmani, takuan sot kryetarin e komunës së Gostivarit Arben Taravari, për ti shprehur atij dhe qytetarëve të Gostivarit ngushëllime për viktimat e 13 shkurtit dhe për të dëshiruar shërim sa më të shpejtë të të lënduarve.
“E njoftova ambasadorin se unë jam vazhdimisht në kontakt me ekipet mjekësore dhe me pacientët e shtrirë në spital dhe se shumica e tyre janë në gjendje stabile, përveç tre pacientëve të cilët janë në gjendje kritike, mirëpo unë shpresoj që ata ta tejkalojnë këtë situatë, pasi besoj në kapacitetin e personelit mjekësor dhe ngase bëhet fjalë për pacientë të moshës relativisht të re”, deklaroi Taravari.
Ambasadori Reka tha se bashkë me konsullin e nderit Imer Selmani kanë ardhur sot në komunën e Gostivarit të solidarizohen me dhimbjen dhe jemi të gatshëm për të dhënë çdo gjë për të cilën keni nevojë.
Ngushëllimet e tija për gostivarasit dhe familjarët e viktimave shprehu edhe konsulli i nderit Imer Selmani, ai shtoi se ky le të jetë një leksion për institucionet shtetërore se shumë më tepër duhet të ndërmerren masa për të shmangur tragjedi të këtilla.