Kombëtarja e Kosovës pësoi humbje të thellë me rezultat 32:21 nga Rumania, në takimin e dytë të grupit 3 të kualifikueseve për Kampionatin Botëror 2021 në hendboll.
Në takimin që u zhvillua në Benevento të Italisë, Kosova nuk ia doli me rumunët, ngase këta të fundit ishin shumë më të mirë, të cilët edhe në pjesën e parë avancuan me 15:7. Rumania shënoi fitore më të lehtë se sa ka pritur.
Pas barazimi 26:26 me Italinë, Kosova kësaj radhe nuk tregoi lojën e një nate më parë.
Rumania prinë në grup me katër pikë, kurse Kosova është në pozitën e tretë me 1 dhe nuk ka as një gjasë për kualifikim. Nesër në orën 16.00 Kosova do të zhvillojë takimin e fundit, me Gjeorgjinë.
"Kosova ka luajtur pa kapitenin dhe organizatorin e lojës, Valon Dedaj që ishte i sëmurë. Edhe lojtarë tjerë të Kosovës janë prekur në ditët e fundit nga gripi.
Në lojën tonë ka pasur dobësi si në sulm ashtu edhe në mbrojtje, ndonëse angazhimi dhe dëshira nuk ka munguar në asnjë moment.
Tani Kombëtarja e ka edhe një ndeshje, të dielen ndaj Gjeorgjisë, me shpresë për përfundim pozitiv të këtij turneu kualifikues", thuhet nga FHK.
Kosova - Rumania 21:32 (7:15)
Kosova: Jupa 2, Fetahu 2, Dedaj, Gërbeshi, Ahmeti 4, Dre. Tahirukaj, Terziqi 3, Beshiri, Abdullahi, Prekazi, Quni, Dri. Tahirukaj 2, Berisha, Ramosaj, Gegaj 1, Gjuka 7.