Hendbollistja e njohur shqiptare nga Gostivari, Bellma Beba, anëtare e HSG Wurm-Mitte nga Munichu i Gjermanisë, prej disa javësh ndodhet e izoluar, për shkak të Koronavirusit.
Në një intervistë për faqen e gazetarit sportiv, Reshat Ibrahimi, ish hendbollistja e Kastriotit të Ferizajt dhe Prishtinës ka rrëfyer për situatën në të cilën po kalon ajo, duke theksuar se e ka marrë malli për familjen, fushat sportive dhe bashkëlojtaret.
Bellma, si po i kaloni këto javë izolimi?
Si në të gjithë botën ashtu edhe këtu është monotoni. Prej një jete dinamike të izolohesh brenda në dhomë nuk është aspak e lehtë. Sidomos për ne sportistet që jemi mësuar të jemi gjithmonë aktive me sport. Të gjithë ne jemi ballafaquar me diçka që nuk e kemi pritur e më pak paramenduar ndonjëherë.
Për çfarë ju ka marrë malli më shumë?
Janë shumë gjëra që njeriun e merr malli. Sigurisht në këto moment mbi të gjitha është familja që e kam në Maqedoni, fushat sportive dhe bashlojtaret.
Cilët janë ambiciet e klubit?
Sezonin e kaluar me klubin luajtëm në Bayernligen dhe ambiciet ishin që të hyjmë në Bundesliga III. Përfunduam në vendin e parë të tabelës, por ende nuk e dimë vendimin e Federatës. Nëse përfundon e gjithë kështu, sezonin e radhës do të luajmë në Bundesligë. Para se të gjithash, në plan të parë e kemi të mendojmë për shëndetin dhe të lutemi që kjo gjendje e vështirë do të kalojë shpejt.