Kombëtarja e Kosovës pëson humbjen e dytë në kuadër të grupit të 8-të të kualifikueseve për EURO 2022 në hendboll (meshkuj).
Suedia triumfon me rezultat 30:16 (15:10) ndaj Kosovës, e cila u zhvillua në Qendrën e Rinisë dhe të Sportit në Prishtinë.
Suedia shumë e fortë, u tregua e pamëshirshme ndaj Kosovës.
Vetëm 12 minutat e parë Kosova u tregua rival i denjë ndaj superfuqisë botërore.
Rezultati 3:2, pastaj edhe 4:2 për Kosovën në minutën e 6-të. Suedezët shpejt mobilizohen dhe barazojnë rezultatin, gradualisht shkëputen në epërsi me 5:8 në minutën e 15-të.
Deri në fund të pjesës së parë e thelluan atë në pesë gola (10:15). Në pjesën e dytë Suedia u tregua edhe më e mirë, duke thellua epërsinë në 10 gola (12:22) në minutën e 45-të.
Kosova nuk kishte takat që të shmang humbjen e thellë nga suedezët, të cilët sa kalonin minutat thellonin epërsinë! Suedia triumfon me 14 gola diferencë (30:16) ndaj Kosovës.
Për Suedinë është fitorja e dytë pas asaj me 33:30 kundër Rumanisë, ndërsa për Kosovën është humbja e dytë pas asaj në Podgoricë me 32:25 nga Mali i Zi. Suedia kryeson me 4 pikë, pasojnë Rumania 2, Mali i Zi 2, ndërsa Kosova është në fund me 0 pikë.
Trajneri i Kosovës, spanjolli Javier Cabanas, u përpoq maksimalisht me djelmoshat e tij, por ka qenë vështirë ndaj Suedisë superiore.
