Izet Demaj, pjesëtar i Policisë së Kosovës pësoi dje nga hajnat të cilët kishin hyrë për të vjedhur në një bankë në Istog.
I njëjti u qëllua me disa plumba në trupin e tij, teksa po tentonte që të ndalonte një rast të grabitjes në këtë komunë.
Mirëpo ky nuk ishte rasti i vetëm i vjedhjes që u raportua në 24 orët e fundit në Kosovë.
Gjatë kësaj periudhe kohore ndodhën edhe hiq më pak se pesë raste tjera.
Në MItrovicë, një femër raportoi se persona të panjohur i vodhën portofolin, në të cilin kishte para dhe dokumente zyrtare.
I njëjti rast është nën hetime.
Në jug të këtij qyteti, dy persona u arrestuan nën dyshimin se të njëjtit kishin vjedhur gjësende të ndryshme në shtëpinë e viktimës.
Të njëjtit u dërguan në mbajtje.
Në Pejë, u arrestuan katër persona pasi që të njëjtit dyshohet se viktimës i kishin vjedhur një lopë.
Edhe këta të dyshuar u dërguan në mbajtje nga Prokuroria.
Ndërkaq në Viti, një person i gjinisë mashkullore ka raportuar në polici se i janë vjedhur para kesh. Rasti shkon në hetime.
Nga hajnat pësoi edhe një person në Prishtinë. Ai në polici raportoi se dy të dyshuar me forcë i kanë grabitur telefonin dhe 150 euro para të gatshme. Nuk raportohet për të lënduar.
Kujtojmë se gjatë ditës së djeshme në Istog, Kamer Metaj, i cili dyshohet se kishte hyrë për të vjedhur në një bankë në qendër të këtij qyteti, u qëllua për vdekje nga Policia e Kosovës.
I njëjti paraprakisht kishte qëlluar mbi policing Izet Demaj, të cilit i kishte shkaktuar plagë vdekjeprurëse.