Bashkëdrejtuesi i Ekipit Dialogues për bisedime me Serbinë, Fatmir Limaj, ka thënë se partnerët ndërkombëtarë – SHBA dhe BE janë bashkë me Kosovën edhe në kalimin e fazës së fundit – dialogut në Bruksel.
“Ata janë bashkë me Kosovën edhe në kalimin etapës së fundit – të sikletshme, dhe futjen në fazën e zhvillimit të vendit”, ka thënë Limaj.
Sa i përket kushtëzimeve që po bën Serbia për të rifilluar bisedimet pas vënies së taksës 100%, Limaj ka thënë se ajo nuk është rrugë që sjell zgjidhje.
“Nuk guxon të legjitimohet kushtëzimi i dialogut, as nga Serbia as nga Kosova. Duhet të krijohet klimë për dialogun përfundimtar. Kosova është e gatshme që sot të shkojë në tavolinë për bisedime. Kemi vullnetin dhe presim edhe nga pala serbe të jetë e gatshme për bisedime për të gjitha temat. Temë mund të jetë edhe taksa”.
“Kosova do të kishte shumë kushte, por në tavolinë ulemi për të lehtësuar dhe kushtëzimet janë komplikim”.