Pos prezencës së madhe të mbeturinave, Komuna e Hanit të Elezit është e mbushur me mbetje të asbestit, material i cili konsiderohet kancerogjen.
Organizata “Let’s do It Kosova”, ka pastruar mbeturina rreth kufirit në këtë komunë, duke thënë se është momenti i fundit që të bëhet diçka për shëndetin e këtyre banorëve, raporton ktv.
Shqetësues, sipas kryetarit të Komunës së Hanit të Elezit, Rufki Suma, është fakti se materialet prej asbestit janë ende në funksion.
Suma thotë se sasia e mbetjeve të asbestit vazhdon të jetë tejet e madhe, por që kërkesat e tyre nuk po merren parasysh nga Qeveria.
Ndonëse kjo komunë i ka larguar nga përdorimi gypat e ujësjellësit me këtë material, ka shumë të tjera që ende vazhdojnë t’i përdorin ato.
Ministri i Mjedisit dhe Planifikimit Hapësinor, Fatmir Matoshi, ka thënë se tashmë është ndarë buxhet dhe premton se këtë çështje do ta marrin më seriozisht.
Për prezencën e madhe të këtij materiali pati reaguar edhe Avokati i Popullit, duke konstatuar se mosndërmarrja e asnjë aktiviteti sensibilizues për vetëdijesimin dhe informimin e publikut për rrezikun që kanë materialet me përmbajtje asbesti, tregon dështimin dhe neglizhencën e autoriteteve kompetente për mbrojtjen e shëndetit të njeriut.
Gypat e azbestit janë përdorur në ujësjellës gjatë viteve 1930-1950. Edhe Instituti i Shëndetit Publik kishte konstatuar se fibrat e amiantit janë kancerogjenë dhe janë lehtësisht të transmetueshme në organizëm.