40 studentë nga Kosova qysh në shtator të këtij viti do të fillojnë studimet master në vende të ndryshme të Bashkimit Evropian, pasi kanë fituar bursa në raundin e 12 të projektit të Skemës së të Rinjve, organizuar nga Zyra e BE-së në Kosovë dhe Ministria e Integrimeve Evropiane.
Këta studentë do të ndjekin studimet në fushat si juridik, ekonomik, administratë publike, kulturë dhe shëndetësi, e pasi të kthehen në Kosovë do të punësohen në institucione.
Me rastin e ndarjes së këtyre bursave, Luigi Brusa, nga Zyra e BE-së në Kosovë, ka thënë se këta studentë do të kenë një mundësi shumë të mirë për të mësuar gjëra të reja.
Brusa: Paratë për këtë bursë janë paratë më së miri të shfrytëzuara në Kosovë
“Arsimimi siç e dini është një fushë e rëndësishme e bashkëpunimit dhe njëra prej mjeteve të cilave e përdorim për të mbështetur arsimimin në Kosovë është skema e bursistëve të rinj, e cila është mjaftë afatgjate. Paraja më së miri e shfrytëzueshme në Kosovë që nga fillimi i këtij projekti. Ju jeni të fundit 40 nga një armatë prej 324 vetash ju keni kaluar në një garë shumë të ashpër dhe jeni këtu sot dhe e keni një shans shumë të mirë. E keni shansin për të përmirësuar njohuritë e juaja që të njoftoheni dhe të jetoni në një ambient modern. Ju do të vendoseni në mes të një rruge të gjatë të krijuar nga vlerat tona themelore”, tha Brusa.
Ndërsa, ministrja e Integrimeve Evropiane, Dhurata Hoxha, tha se ngritja e kapaciteteve për shërbimin civil është një prej parakushteve esenciale për realizimin e obligimet në kuadër të procesit të Stabilizim-Asociimit.
Ajo bëri të ditur se që nga viti 2004 përmes këtij projekti 322 studentë nga Kosova janë dërguar për studime jashtë vendit, e të cilit janë kthyer dhe janë punësuar në kuadër të administratës publike në vend.
Hoxha: Pas kthimit do t’i angazhojmë në institucione dhe në ministri
“Aktualisht kemi 50 studentë të cilët janë dërguar për studime dhe të cilët priten të kthehen brenda vitit, pra edhe ata i mirëpresim dhe patjetër që do t’i angazhojmë në institucione dhe nëpër ministri të ndryshme në Qeveri. Ndërsa, nga raundi i fundit për këtë vit do të dërgohen edhe 40 studentë, të cilët gjithashtu do të kthehen prej studimeve dhe do të punësohen. Ne si Ministri e Integrimit Evropian, por gjithashtu edhe Qeveria e Kosovës, mbetet e përkushtuar për ta avancuar më tutje procesin e reformës të administratës publike dhe kemi bashkë financuar dy raundet e fundit me vlerë totale prej 1 milionë euro. Ndërsa, projekti si i tillë do të vazhdojë dhe do ta ketë përkrahjen tonë edhe më tutje edhe në vitet pasuese”, u shpreh ajo.
Ministrja Hoxha u shpreh se ky projekt është unik pasi mundëson arritjen e disa qëllimeve, siç përmendi ajo edukimin e të rinjve në fusha të specializuara, ofrimin e punës së sigurt pas kthimit nga studimet dhe përmirësimin e kapaciteteve të institucioneve publike përmes përfshirjes së këtyre të rinjve.
Diellza Mujaj një nga bursistet që do të ketë mundësi të studiojë në një vend të BE-së, tha se kjo është një mundësi shumë e mirë për të.
Mujaj: Një mundësi e madhe
“Këtë e shoh si një mundësi të madhe për të bërë një kontribut të madh si në procesin e integrimit evropian të këtij vendi”, tha ajo.
Në këtë ceremoni organizata Young Cell Scheme Alumni Association ka bërë ndarjen e donacionit të librave për Universitetin e Prishtinës “Hasan Prishtina”. Librat i ka pranuar rektori i UP-së Marjan Demaj, i cili tha se ky donacion është shumë i rëndësishëm për studentët e UP-së.
Demaj: Jemi duke punuar fuqishëm që ta plotësojmë literaturën në UP
“Vije pikërisht në një fushë ku jemi duke punuar fuqishëm që ta plotësojmë literaturën në Universitet të Prishtinës, por jo vetëm aq po edhe ta ndryshojmë atë praktikën e keqe që studentët tanë të mësojnë për teste, por të mësojnë për dije”, tha ai.
Të 40 bursistët studimet do t’i fillojnë në shtator të këtij viti.
