Bizneset që përdorin transportin detar, me destinacion të mallit Kosovën, kanë ndryshuar kah të vijës detare.
Për dallim nga vitet e kaluara që shfrytëzohej porti i Selanikut, tash mallrat po vijnë përmes Portit të Durrësit.
Udhëheqësi i njësitit, Sherif Havolli, tregon se 40 përqind më shumë është rritur prania e mallit në këtë port me destinacion Kosovën, që nga vendosja e pikës doganore.
Mirëpo, deri në qershor, dogana ka të drejtën vetëm të pranimit të mallrave që vijnë për Kosovë, por jo edhe eksportin e tyre.
Megjithatë, dhënia e kësaj mundësie ishte përfolur prej kohës, ani se u realizua tek më 14 janar të këtij viti.
Delegacionet e Kosovës dhe Shqipërisë për shumë vjet diskutuan për vendosjen e Doganës së Kosovës në Portin e Durrësit. Fillimisht Kosovës iu premtua dhënia nën menaxhim të Porit të Shëngjinit, por që më pas Qeveria e Shqipërisë u tërhoq. Si përfundim në janarin e këtij viti ideja u thjeshtëzua, dogana u vendos me pikë të vetën në Portin e Durrësit.
Hapja e doganës në portin detar ka ndikuar edhe fillimin e importit të produkteve të vendeve, që më herët nuk ka pasur import në Kosovë.
Oficeri i lartë i pikës, Afrim Paca, tregon se pranimi i këtyre mallrave bëhet përmes tri terminaleve, ai i trageteve, anijeve e kontejnerëve.
Dogana ka në dispozicion 2 ekipe me nga 5 persona të cilët çdo javë dërgohen në port.
Ekipet pritet të shtohet me rritjet e fluksit të punës.
