Nesër, (e shtune) 20 Prill, nga ora 13:00 – 14:30, para monumentit HEROINAT në Prishtinë do të lansohet projekti #Forheroines.
Pjesë e këtij instalacioni do të jenë:
· Mark Gjonaj, anëtar i këshillit të New York
· Vasfije Krasniqi e mbijetuara e dhunës seksuale gjatë luftës,
· Feride Rushiti, drejtoreshë e KRCT
· Përfaqësues institucional dhe ndërkombëtarë;
Projekti #forheroines i dedikohet Heroinave tona, që u dhunuan gjatë luftës së fundit në Kosovë, është një thirrje për drejtësi dhe për bashkim. 20 vite, mbi 20.000 gra duke kërkuar drejtësi.
Pjesë kryesore e projektit është aktiviteti i shpërndarjes së 7 karaktereve “# F O R H E R” në qytetet kryesore të Kosovës, dhe në ato karaktere në shenjë solidarizimi me gratë e prekura nga kjo dukuri do të ngjiten vathët: “#” në Prishtinë; “F” në Mitrovicë; “O” në Pejë; “R” në Gjakovë; “H” në Prizren; “E” në Ferizaj; “R” në Gjilan.
Çdo karakter do të jetë i ndërtuar nga pjesë të kanvasit të futura në kornizë në formë të mozaikut (katror) ku njerëzit mund të vendosin vathët e tyre, duke u solidarizuar me heroinat tona.
Përveç karaktereve, afër tyre do të vendoset shtandi informativ për të gjithë njerëzit që janë të interesuar të dinë më shumë detaje rreth projektit.
