Sot, në një solemnitet rasti, shkolla fillore e mesme e ultë “Atë Gjergj Fishta”, në Jagodë të Klinës ka nderuar me mirënjohje vëllezërit humanistë, veprimtarë dhe atdhetarë, me origjinë nga ky fshat, të cilët jetojnë në Amerikë, përkatësisht në Nju Jork, Leke dhe Hil Përlleshin, për kontributin e dhënë para dhe pas luftës për shkollën e vendlindjes së tyre, arsimin shqipe dhe atdheut përgjithësisht. Vëllezërit, Hil dhe Lekë Përlleshi, janë pinjoj të familjes Përlleshi, një familje me tradita atdhetare dhe nacionaliste, janë bijë të burrit të nderuar dhe burrit të nderuar dhe urtakut të Lugut të Drinit, atdhetarit, Pren Përlleshi dhe nipa të luftëtarit të denjë për lirinë e Kosovës dhe bashkimin kombëtar, Ndue Përlleshi,
Në këtë ceremoni, mori pjesë edhe kryetari i Komunës së Klinës, prof. dr. Zenun Elezaj, drejtori i Drejtorisë për Arsim, prof. Arben Limani dhe bashkëpunëtorë të tjerë.
Me këtë rast, kryetari i Komunës, Prof. Dr. Zenun Elezaj, ka vlerësuar lartë kontributin e familjes Përlleshi, të cilët për idealizmin dhe humanizmin e dhënë në etapa të caktuara kur vendlindja dhe atdheu i tyre kanë pasur nevojë gjithherë i janë përgjigjur dhe kanë kontribuar denjësisht.
Kryetari Elezaj, një mirënjohje të veçantë shprehur për profesorin shumëvjeçar të gjimnazit “Luigj Gurakuqi”, mësimdhënësit dhe ish-drejtorit të shkollës “Atë Gjergj Fishta, profesor Lekë Përlleshi, kontributi i të cilit është i madh, sidomos gjatë viteve të ’90-ta kur mbijetesa dhe mbrojta e shkronjave shqipe dhe të arsimit shqip dhe qenies kombëtare bënte jetën shqiptare.
“Edhe profesor Lekës dhe gjithë pishtarëve të tjerë të arsimit të cilën u gjenden në ato vite të stuhishme në ballë të mbrojtjes së shkollës shqipe, populli gjithherë do t’u jetë mirënjohës dhe nga ky popull do të gëzojnë respektin e përhershëm, theksoi kryetari Elezaj, i cili ne vijim u shpreh se institucionet komunale do të vazhdojnë me projekte që ndikojnë në përmirësimin e kushteve infrastrukturore në shkolla, me qëllim që të krijohet një ambient i përshtatshëm për mësimnxënie, theksoi ndër të tjera kryetari Elezaj. Ndërkaq, drejtori i kësaj shkolle, prof. Dodë Grbanica, në fjalën e tij, theksoi Me lejoni që t’ju përshëndes dhe t’ju uroj mirëseardhje në këtë eveniment tonin, që sot kemi organizuar sot, si shprehje e respektit dhe mirënjohjes për dy bashkëvendësit dhe bashkëqytetarët tanë, veprimtarë dhe humanistë të shquar, Hil dhe Lekë Përlleshi, të cilët jetojnë dhe veprojnë në Amerikë, përkatësisht në Nju Jork, për kontributin e dhënë shkollës sonë nëpër etapa të ndryshme kohore. Pjesëmarrja e vëllezërve, Hil dhe Lekë Përlleshi, sot këtu mes nesh, me prezencën e tyre kanë nderuar nxënësit tanë, mësimdhënësit tanë, gjithë shkollën dhe fshatin tonë të Jagodës, të cilëve njëherësh ju jemi tepër mirënjohës.
Hil dhe Lekë Përlleshi, vijnë si pinjoj nga familja nacionaliste dhe atdhetare, Përlleshi, e Jagodës, bijë të burrit të njohur e të nderuar të kësaj ane dhe atdhetarit të shquar, Pren Përlleshi dhe trashëgues të familjes së nacionalistit dhe luftëtarit të denjë dhe të paepur për lirinë e Kosovës dhe bashkimin kombëtar, Ndue Përlleshi, me këta emra të këtyre bijve dhe me këtë familje sot krenohet i tërë fshati, krenohet Lugu i Drini, krenohet Kosova!
Profili jetësor, i angazhimit dhe i veprimtarisë së vëllezërve Përlleshi, Hil dhe Lekë Përlleshi, është shumë i rëndësishëm dhe tepër dimensional në shumë fusha të jetës.
Të prezantosh portretin e profesor Lekë Përlleshit, do të thotë të kesh shumë motivacione dhe arsye. Profesor, Lekë Përlleshi, një personalitet, i cili gjatë rrugës së tij jetësor ka lënë gjurmë të thella, sidomos në fushën e arsimit dhe të edukimit shqip. Fillet e veprimtarisë së tij në fushën e arsimit dhe të edukimit shqip janë të hershme dhe reflektojnë rezultate inkurajuese. Si profesor i gjuhës angleze (ka të kryer Fakultetin Filozofik – Degën e Gjuhës dhe letërsisë angleze në Prishtinë), ka filluar në vitin 1976 në shkollën fillore “Hasan Prishtina” në Prishtinë, po ashtu për shumë vite ka punuar si profesor i gjuhës angleze në gjimnazin “Luigj Gurakuqi” në Klinë, gjatë viteve kur regjimi serb mbylli portat e kësaj shkolle dhe nxënësit e mësimdhënësit shqiptarë i largoi nga objekti i tyre shkollor, profesor Leka ishte i angazhuar në Punktin e Zllakuqanit, njëherësh punonte edhe në shkollën fillore “Atë Shtjefën Gjeçovi” në Zllakuqan.
Gjatë viteve 1992 deri në vitin 1998 është emëruar drejtor i shkollës së Jagodës dhe gjatë këtyre viteve kësaj vatre të dijes dhe diturisë shkollës, të cilës i ishte instaluar drejtoria e dhunshme serbe, profesor leka, si drejtor shkolle në koordinim me organet e arsimit të Komunës dhe të Republikës së Kosovës, ka arritur që ish-emrin e kësaj nga “Petar Petroviq Njegosh”, në emrin e fratit dhe të rilindësit të shquar, të Homerit shqiptar, “Atë Gjergj Fishta”, të cilin emër edhe sot e mban me krenari.
Nxënësit dhe kolektivi i shkollës, profesor Lekës, i është mirënjohës për gjithë punën dhe angazhimin që ka zhvilluar në ruajtjen e mbijetesës së kësaj çerdhe të diturisë dhe ngritjen e nivelit të saj në procesin edukativo-mësimor dhe veprimtaritë tjera shkollore dhe jashtëmësimore, si pjesë përbërëse të mësimit dhe edukimit shqip, gjithmonë duke e kuptuar maksimën se “vetëm të mësuarit mund të na shpjer përpara!” është shprehur ndër të tjera drejtori Grabanica.
Me një fjalë falënderuese, nxënësve, mësimdhënësve dhe gjithë të pranishmëve iu drejtuar ish-drejtori i kësaj shkolle, veprimtari dhe humanisti, prof. Lekë Përlleshi, i cili iu uroj suksese dhe mbarësi në rrugën e dijes dhe gjithë aspektet e jetës.
Një pjesë e këtij aktiviteti ishte konceptuar me një program kulturo-artistik përgatitur nga nxënësit e shkollës.
