QKU: Radiologjia do të transformohet në klinikë moderne

Kosova

QKU: Radiologjia do të transformohet në klinikë moderne

Më: 22 maj 2019 Në ora: 11:34
Foto

Shërbimi Spitalor dhe Klinik Universitar i Kosovës nëpërmjet një komunikate për media bën të ditur se është duke investuar në Radiologji, përmes projektit të transformimit në një klinikë moderne.

Sipas komunikatës investimet kapitale kanë filluar dhe së shpejti do të instalohet rezonanca e dytë magnetike, blerë së fundmi, si dhe Tomografia e Kompjuterizuar (CT). 

“Me angazhimin menaxhmentit dhe përkushtimit të personelit në Klinikën e Radiologjisë, është hequr lista e pritjes për pacientë të hospitalizuar për shërbimet e Tomografisë së Kompjuterizuar (CT) dhe është  zvogëluar lista e pritjes për pacientët ambulantor për kontrollimet me rezonancë magnetike, pas angazhimit të stafit gjatë natës dhe fundjavave”, thuhet në komunikatë.

Siq ceket në komunikatën e QKU-së deri tash, pacientët kanë pritur deri në një vit për rezonancë, kurse tani lista e pritjes është reduktuar në vetëm dy muaj. “Vlen të theksohet, gjithashtu, se është eliminuar rrjedhja e rrezatimit në disa kabinete, që është konfirmuar  me raportin e Agjencisë për Mbrojtjen nga Rrezatimi”, thuhet në komunikatën e dërguar për media.

Po ashtu bëhet e ditur se planifikimi i renovimit të tërësishëm për instalim e sistemit të ri të ventilimit, me qëllim të krijimit të kushteve më të mira në punë, që ka munguar për disa vjet, është në përfundim.

“Teknikëve të radiologjisë në kujdestari u është zvogëluar orari i punës, derisa me propozimin e vet radiologëve, të gjithë do të jenë të inkuadruar në orar të kujdestarisë”, thuhet në komunikatën për media.

Klinika e Radiologjisë ka punuar edhe në ngritjen profesionale të stafit, sipas teknikave të fundit imazherike.

Me rritjen e numrit të kompjuterëve dhe instalimin e printerëve, për herë të parë në çdo hapësirë, radiologët kanë kushte më të mira të punës.

Me angazhimin profesional të teknikëve, përdorimi i blendave dhe i mbrojtjes jep siguri nga rrezatimi për pacientët e shërbyer. 
 

Image
commentFirst article
Sot mund të lexoni Shfletoni kopertinat