Varrezat e Bellanicës së Malishevës, janë të mbushura, dhe banorët po kërkojnë një parcelë tjetër. Ata kanë propozuar një lokacion, por është pronë e komunës. Ndërsa, në komunë premtojnë zgjidhje.
Banore e fshatit Bellanicë të Malishevës, po kanë problem me hapësirë për varrezat e fshatit. Varrezat e tanishme, janë mbushur, dhe banorët po kërkojnë një lokacion të ri.
“Telashe kamë pasur edhe vet personalisht me vëllain e ndjerë që ka vdekur në nëntor të vitit të kaluar. Brengosjen më të madhe e kam pasur ku do ta varrosi atë. Fatmirësisht kish pas një hapësirë aty në mes të varrezave dhe më është dukur sikur më është ringjallur vëllai. Ka raste kur hapet varri edhe dalin kockat e të vdekurve më të hershëm”, deklaroi për RTV Dukagjinin, Rraman Surtolli.
Kjo telashe ka vite që po e përcjell këtë fshat mirëpo tani nuk ka hapësirë fare për varre. Parcelën të cilën e kanë propozuar banorët e fshatit aktualisht është pronë e Komunës së Malishevës, por që duhet të intervenohet edhe në rrugën që të qon tek vendi i propozuar për varreza.
“Varrezat e vjetra janë mbushur dhe nuk ka më hapësirë. Ne kemi një projekt tjetër në një pjesë tjetër që quhet “Bregu i urës”, por në fillim prioritet tjetër është rregullimi i urës pastaj edhe zhvendosja. Nëse nuk rregullohet rruga, varrezat kot i vendosim atje sepse është vështirë të barten pastaj…”, tha Isuf Surtolli.
Në Drejtorinë e Kadastrit në Malishevë në pronësinë e së cilës edhe është parcela, thonë se sapo të dorëzohet peticioni i cili është i gatshëm nga banorët do të shqyrtohet nga komuna dhe do të bëhet zgjidhje.
“Kam informacion se kanë mungesë të hapësirës për varreza. Banorët kanë kërkuar një lokacion të ri për varreza, mirëpo zyrtarisht nuk kemi pranuar ndonjë kërkesë prej tyre. Në momentin që pranojmë kërkesë, ne do ta procedojmë më tutje kërkesën dhe do t’i shohim mundësitë në Kuvendin Komunal”, deklaroi Bashkim Krasniqi.
Por nga komuna e Malishevës thonë se nëse vendi i propozuar nga banorët nuk i plotëson kushtet do të shohin mundësin që edhe të ndryshohet lokacioni.
