Shkaku i gjarpërinjve, një familje lipjanase po qëndron që tri ditë në oborr

Kosova

Shkaku i gjarpërinjve, një familje lipjanase po qëndron që tri ditë në oborr

Më: 9 qershor 2019 Në ora: 22:44
ilustrim

Tetë anëtarët e familjes Ahmeti nga fshati Resinoc i Komunës së Lipjanit, ka 3 ditë që po qëndrojnë në oborr.

Kjo pasi ndihen të pasigurt nga një grumbull gjarpërinjsh që ka hyrë në shtëpinë e tyre.

Përparim Ahmeti, thotë se nata e së enjtes për të ka qenë ndër më të vështirat, pasi që derisa ishte në gjumë, një gjarpër ia kishte mbështjell këmbën.

Ahmeti thotë se së paku 30 sosh i ka mbytur vetë, prandaj edhe ka kërkuar ndihmë nga Komuna e Lipjanit.

Kështu, ata janë detyruar të jetojnë në oborr të shtëpisë.

Familja Ahmeti është duke pritur që Komuna të intervenojë në zgjidhjen e këtij problemi.

Ata tregojnë se Ekipi për Mbrojtje dhe Shpëtim i Komunës së Lipjanit dhe Policia, i kanë vizituar, por ende nuk u kanë ofruar zgjidhje.

Në Komunën e Lipjanit kanë thënë se të hënën sërish do ta vizitojnë këtë familje dhe do t’i shfrytëzojnë të gjitha mundësitë dhe kapacitetet për t’i ofruar zgjidhje.

Derisa, familja Ahmeti kërkon që së paku të kenë një vendstrehim më të sigurt, pasi që jeta e tyre, siç kanë thënë, është në rrezik.

commentFirst article
Sot mund të lexoni Shfletoni kopertinat