Në kuadër të Muajit të Prindësisë, ministri i Shëndetësisë, Uran Ismaili së bashku me gruan e tij, Arizona Bërdynaj kanë marrë pjesë në një bashkëbisedim me prindërit e ri, në kuadër të projektit të UNICEF-it në Kosovë.
Ministri Ismaili duke iu përgjigjur pyetjeve të qytetarëve, foli për shumë çështje që kryesisht kanë të bëjnë me qasjen e baballarëve në rritje të fëmijëve. Mirëpo, foli dhe për shëndetësinë në nivel vendi.
I pari i shëndetësisë tha se ka ardhur koha që gjithë baballarët të jenë më të pranishëm te fëmijët.
Ai mes tjerash theksoi se asnjë prind nuk e ka ekskluzivin e rritjes së një fëmije dhe duhet që bashkërish me bashkëshortet të bëhet një normë e re.
Ismaili: Baballarët të jenë më të pranishëm te fëmijët
“Realisht, ne e dimë kulturën ku jetojmë dhe fillimi i ndryshimeve fillon nga vetvetja në çdo çift. Ne realisht jetojmë, jemi një çift më i ri. Mirëpo, ekziston dhe ka hapësirë për të gjithë prindërit, baballarët për t’u involvuar qoftë në kohët siç e tha dhe Arizona, janë kohë ndoshta stresuese për fëmijët ndoshta është më e lehtë për të dy prindërit... Asnjëri prind nuk ka ekskluzivitet, ndoshta në gjithnjë po, por në ushqim në mirëmbajtje në edukim në zhvillimin e aftësive të tyre të lexuarit nuk ka ekskluzivitetin dhe kjo është ajo norma që duhet ta ndërrojmë sot”, tha ai.
Ministri foli edhe për listën esenciale të barnave ku tha se me anë të udhëzimit administrativ do të ulen çmimet e barnave në nivel vendi.
Ismaili: Udhëzimi administrativ do t’i lirojë barnat
“Udhëzimi administrativ, që e kam shkruar, do t’i lirojë të gjitha barnat në gjithë Republikën e Kosovës. Kemi bërë llogaritjet, ne paguajmë 10 milionë euro më shumë në barna se të gjithë qytetarët e Maqedonisë ose Shqipëri. Udhëzimi administrativ do t’i lirojë barnat dhe të nivelizojë një barnatore në Prishtinë dhe një në fshat të thellë do të jenë njëjtë”, tha ai.
Ndërkaq, Arizona Bërdynaj tregoi mbështetjen që ka marrë nga bashkëshorti, ministri Ismaili në procesin e rritjes së fëmijëve.
Bërdynaj: Urani është involvuar shumë në rritjen e fëmijëve
“Direkt po, Urani është involvuar shumë në procesin e ndërrimit të natës. Normal që gji-dhënia, ti je më aktive shumë. Mirëpo, është një fat i mirë që ne kur të lindim pushojmë dhe këtë nuk pushojnë, sepse është dashur që Urani të fillojë punën, është një mirëkuptim”, tha ajo.
Ndryshe, prej datës 1 deri më 30 qershor njihet si Muaji i Prindësisë.
