Sot në një ceremoni zyrtare u hapën dyert e Qendrës Informuese për Shëndetin e Gruas “Klasat për Nëna” në Qendrën Kryesore të Mjekësisë Familjare (QKMF) në Kamenicë.
Kjo iniciativë është bërë e mundshme falë financimit të Ambasadës së Zvicrës në Kosovë dhe bashkëpunimit me Qendrën Kryesore të Mjekësisë Familjare në Komunën e Kamenicës dhe fondacionit Action for Mothers and Children.
Qendra do të ofrojë shërbime edukative, aktivitete të mirëqenies fizike dhe psikike, informacione këshilluese për kujdesin para dhe pas lindjes, depresionin e paslindjes, ushqyerjen me gji, kujdesin për të sapolindurin, të ushqyerit e foshnjës, imunizimin, si dhe kujdesin ndaj fëmijës.
Ajo është e hapur çdo ditë pune, teksa orari i sesioneve do të jetë i publikuar në QKMF në Kamenicë, në uebfaqen e Action for Mothers and Children, si dhe grupin në rrjetet sociale të Qendrës – Klasat për Nëna.