Që mga paslufta, në qendrat për punë sociale nuk ka psikologë. Edhe pse në këto qendra kërkojnë ndihmë fëmijët e gratë e keqtrajtuara, institucionet përkatëse nuk kanë punësuar asnjë psikolog. Mirëpo, Ligji parasheh që në qendra të tillë të jetë i punësuar minimalisht një psikolog.
Brenda objektit të Qendrës për Punë Sociale në Prishtinë, drejtohen fëmijë të keqtrajtuar, të braktisur e dhunuar.
E nuk janë të rralla kur rastet e grave ndaj të cilave ushtrohet dhuna, trajtohen aty.
Por për t’u marrë me rreth 1000 raste që orientohen në këtë Qendër, nuk ka asnjë psikolog që nga paslufta.
Nga Drejtoria e Mirëqenies Sociale në Komunën e Prishtinës, u tha se vazhdimisht janë bërë kërkesa për punësimin e psikologëve.
Sipas drejtorit Dren Kukaj, në shtator ka mundësi që të aprovohen kërkesat për dy psikologë, por as ata nuk do të ishin të mjaftueshëm.
Ai thotë që zgjidhje e vetme është buxhetimi i mjeteve për kontraktimin e organizatave joqeveritare, në mënyrë që të ofrojnë resurse njerëzore për psikologë.
Por probleme ka edhe me punëtorët social.
E zbrazëtinë që e shkakton mungesa e një psikologu në qendra të tilla, e kanë vërejtur edhe nga institucioni i Avokatit të Popullit.
Sipas Mehdi Gecit, nga ky institucion i kanë rekomanduar Komunës së Prishtinës që të bëjnë punësimin e psikologëve. Ligjërisht në secilën qendër për punë sociale duhet të jetë i punësuar të paktën një psikolog, marrë parasysh rastet të cilat paraqiten aty.
