Komuna e Skënderajt ka mbledhur rreth 60 mijë euro për të ofruar ndihmë për të prekurit nga tërmeti në Shqipëri. Nga kjo shumë, është bërë e ditur se 5 mijë euro do të ndahen për familjen Abazi nga Livoçi i Gjilanit, djemtë e së cilës mbetën të vdekur nga tërmeti.
Përmes një komunikate drejtuar mediave, Komuna e Skënderajt ka marrë iniciativë iniciativë bashkë me bizneset dhe ekonomitë familjare që të ndihmojnë Shqipërinë, duke dërguar pako ushqimore, veshmbathje e gjëra të tjera elementare.
“Lusim qytetarët që dëshirojnë të ndihmojnë në forma të ndryshme të lajmërohen te komisoni i lartëpërmendur”, thuhet në komunikatë.
Në mesin e atyre që kanë dhuruar para për të prekurit nga tërmeti është edhe Kryetari i Komunës, Bekim Jashari. Ai ka dhuruar 5 mijë euro. Mjete financiare kanë dhënë edhe Drejtorët e Drejtorive dhe asambleistët.
“Nga kjo, Drejtorët e Drejtorive të komunës së Skenderajt kanë kontribuar secili nga 100€ dhe të gjithë asambleistët komunal nga 50€”, thuhet tutje në komunikatë.
