Gjykata Themelore në Prishtinë, të enjten, e ka veçuar procedurën për të akuzuarin Masar Gashi, cili së bashku me 44 mjekë të tjerë të spitaleve publike në Kosovë, po akuzohen për vepra penale të korrupsionit, në rastin e njohur si “Stenta 2”.
Veçimi i procedurës për Gashin, është bërë pasi që paraprakisht për shkaqe shëndetësore, gjatë seancave të kaluara ishte veçuar procedura edhe për të akuzuarit Ferid Susuri, Murat Abazi dhe Ferihane Sefa. Kësisoj, ky proces gjyqësor që kishte filluar me 45 akuzuar, tashmë do të vazhdojë për 41 të akuzuar.
Kryetarja e trupit gjykues për këtë rast, Shadije Gërguri, tha se më 22 janar 2020, ka pranuar një parashtresë nga mbrojtësi i të akuzuarit Gashi, avokati Sefer Morina, i cili kishte kërkuar shtyrjen e seancave të parapara për 23 dhe 24 janar 2020, me arsyetimin se i akuzuari Gashi është në gjendje të rëndë shëndetësore.
Në këtë parashtresë, gjykatësja tha se avokati ia ka bashkëngjitur edhe dokumentacionin mjekësor, në të cilin është edhe mendimi i mjekut, i cili kishte konstatuar se i akuzuari lëviz me vështirësi dhe që kishte rekomanduar që ai nuk do të mund të merr pjesë në seancat gjyqësore.
Lidhur me këtë kërkesë të avokatit, gjykatësja kërkoi mendimin e prokurores së rastit, Florije Salihu-Shamolli, e cila tha se ndoshta është e nevojshme mendimi i ekspertit, i cili e ka përpiluar diagnozën, lidhur me gjendjen e Gashit, para se të vendoset për veçimin apo jo të procedurës ndaj tij.
Të akuzuarit tjerë bashkë me mbrojtësit e tyre, patën mendime të ndryshme lidhur me atë se a duhet të veçohet apo jo procedura nga Gashit dhe pas disa deklarimeve, trupi gjykues vendosi që të veçojë procedurën ndaj tij.
Sipas gjykatëses Gërguri, gjykata në afat sa më të shkurtë do t’i drejtohet edhe institucionit nga i cili janë siguruar dokumentet mjekësore për gjendjen e të akuzuarit, me qëllim të konstatimit dhe verifikimit se a është në gjendje të përcjell i njëjti gjykimin. Sipas Gërgurit, kjo po bëhet për qëllim të ekonomizimit të këtij procesi.
Ndryshe, në seancën e së enjtes, dëshminë e tyre lidhur me këtë rast e kanë dhënë dëshmitarët, Shaban Ballazhi dhe Arton Haxhija.
Seanca e radhës, është caktuar të mbahet më 24 janar 2020.
Ndryshe, në rastin “Stenta 2”, kanë qenë të përfshirë 45 mjekë, por për shkaqe shëndetësore, gjatë seancave të kaluara ishte veçuar procedura për të akuzuarit Ferid Susuri, Murat Abazi dhe Ferihane Sefa.
Me akuzat e PSRK-së në këtë rast, tashmë janë duke u përballur 42 të akuzuar, përkatësisht, Gani Bajraktari, Nexhmi Zeqiri, Daut Gorani, Elfedin Muhaxheri, Reshat Emra, Hamza Selmani, Ismajl Avdimetaj, Sali Shala, Nehat Rexhepaj, Agron Besimi, Petrit Ademaj, Bajram Mziu, Agron Leka, Driton Miftari, Besim Guda, Mirdi Strana, Shemsedin Shabollari, Fisnik Hima, Luan Pazhari, Galin Berisha, Bajram Preteni, Lulzim Kamberi, Sami Gjoka, Faik Shatri, Ejup Pllana, Florim Sadiku, Halim Halili, Agim Krasniqi, Hajdin Çitaku, Edmond Haliti, Besnik Koliqi, Afrim Poniku, Banush Gashi, Nebih Musliu, Dardan Koqinaj, Xhevdet Krasniqi, Lazër Prekpalaj, Rexhep Manaj, Kelmend Pallaska dhe Arlind Batalli.
Këta të akuzuar ishin deklaruar të pafajshëm në lidhje me akuzat për të cilat ngarkohen nga ana e Prokurorisë Speciale të Republikës së Kosovës (PSRK), në shqyrtimin fillestar që ishte mbajtur për këtë rast, në shkurt të vitit 2018.
Në këtë rast, të përfshirë kishin qenë edhe ish-ministri i Shëndetësisë (MSH), Ferid Agani, ish-sekretari i MSH-së, Gani Shabani dhe 11 të akuzuar të tjerë, mirëpo, rasti ishte veçuar në tri pjesë në shqyrtimin fillestar.
Ish-ministri Agani dhe ish-sekretari Shabani ishin shpallur fajtor në prill 2019, me c’rast Agani ishte dënuar me 2 vjet e 6 muaj burgim efektiv, ndërsa Shabani me 2 vjet burgim efektiv. Mirëpo, pas ankesave të mbrojtësve, ky rast tashmë është kthyer në rigjykim nga Gjykata e Apelit.
Kurse, procesi gjyqësor në rastin “Stenta 3”, ku janë të përfshirë kryesisht, drejtorë e mjekë të spitaleve private pritet të fillojë së shpejti, pasi që aktakuza ndaj tyre është konfirmuar nga dy instancat gjyqësore.
Të akuzuarit në rastin “Stenta 2”, ngarkohen nga PSRK-ja me veprat penale të keqpërdorimit të pozitës apo autoritetit zyrtar dhe marrje ryshfeti.
Sipas aktakuzës së PSKR-së, ekziston dyshimi i bazuar mirë, se nga 1 janari 2011 e deri më 31 dhjetor 2015, duke vepruar në bashkëkryerje nga pozita e mjekëve në SHSKUK, kanë keqpërdorur pozitat dhe autoritetin e tyre zyrtar, në atë mënyrë që duke i tejkaluar kompetencat e tyre si anëtarë të komisioneve konziliare të Klinikës së Kardiologjisë, me dashje dhe dijeni ua kanë lëshuar letrat referuese për trajtim jashtë institucioneve publike shëndetësore së paku 233 persona edhe pse të njëjtit i kishin kryer trajtimet mjekësore.
Sipas aktakuzës, një gjë e tillë ishte bërë që personave në fjalë, tua mundësonin kompensimin e shpenzimeve nga Ministria e Shëndetësisë, për trajtim mjekësor në institucione private edhe pse, siç thotë aktakuza, në bazë të nenit 53 të Ligjit mbi Shëndetësinë, Nr.2004/04, të 19 shkurtit 2014 dhe neneve 16 dhe 25 të Ligjit për Shëndetësinë Nr.04/L-125 të 13 dhjetorit 2012, letrat referuese duhej t’u lëshohej pacientëve në momentin kur konstatohej se pacientët nuk kishin mundësi të trajtoheshin brenda sistemit publik shëndetësor.
Me këto veprime të të akuzuarve, PSKR pretendon se dëmi që i është shkaktuar buxhetit të Kosovës është 4,555,553.00 euro.
Po ashtu, aktakuza i ngarkon mjekët në rastin “Stenta 2”, se kanë keqpërdorur pozitën zyrtare dhe kanë marrë ryshfet, ashtu që, në vend se pacientët që kanë shkuar për kontroll në institucione publike shëndetësore, t’i referonin në njësinë kompetente invazive në Klinikën Kardiologjisë në SHSKUK në Prishtinë, të njëjtit pacientët i kanë referuar në spitale private dhe për këto veprimet kanë marr ryshfet.
Sipas aktakuzës, për çdo pacientë që e dërgonin për vendosjen e stentave, merrnin nga 500 euro ryshfet, ndërsa për koronarografi merrnin nga 150 euro ryshfet.
Këto veprimet të tyre, sipas PSRK-së, të akuzuarit i kishin kryer në bashkëpunim me të akuzuarit që tashmë janë të përfshirë në rastin “Stenta 3”, ku janë kryesisht pronar e mjekë të spitaleve private.
Prokuroria e Shtetit më 15 qershor 2016, kishte ngritur aktakuzë kundër ish-ministrit të Shëndetësisë, Ferid Agani, ish-sekretarit të përgjithshëm të MSh, Gani Shabani dhe 62 personave të tjerë, për veprat penale “keqpërdorimi i pozitës apo autoritetit zyrtar”, “marrje e ryshfetit”, “dhënie e ryshfetit”, “trajtimi i pandërgjegjshëm mjekësor”, “ushtrimi i kundërligjshëm i veprimtarisë mjekësore dhe farmaceutike” dhe “shmangia nga tatimi “.
Në ndërkohë, prokuroria kishte hequr dorë nga ndjekja penale ndaj kardiologut Afrim Bekteshi, me arsyetimin se i njëjti është përfshirë gabimisht në aktakuzë.
Në ketë çështje penale hetimet fillimisht janë zhvilluar kundër 116 personave fizik dhe 4 personave juridik. Mirëpo për 56 persona fizik nuk janë plotësuar kushtet ligjore që të përfshihen në këtë aktakuzë, andaj për të njëjtit janë pushuar hetimet, raporton “Betimi për Drejtësi”.
Mbrojtja e të akuzuarve ka ngritur dilema të shumta rreth ligjshmërisë së kësaj aktakuze, e cila sipas tyre, përveçse përmban prova të papranueshme ajo është ngritur në mënyrë të kundërligjshme nga prokurori i Zyrës së Kryeprokurorit të Shtetit, Besim Kelmendi. Sipas mbrojtjes, Zyra e Kryeprokurorit të Shtetit nuk ka kompetenca në ngritjen e aktakuzave siç ka ndodhur në këtë rast.
