​Qytetarët të respektojnë vendimet e Qeverisë për menaxhimin e situatës me koronavirus

Kosova

​Qytetarët të respektojnë vendimet e Qeverisë për menaxhimin e situatës me koronavirus

Më: 15 mars 2020 Në ora: 20:47
Ilustrim

Bazuar në propozimin e Odës së Farmacistëve të Kosovës (OFK), Komiteti për Koordinim dhe Vlerësim të situatës me koronavirus, kërkon që qytetarët të respektojnë vendimet e Qeverisë për menaxhimin e situatës dhe rregullat për mbrojtjen e personalit shëndetësor me rastin e marrjes së shërbimeve.

Ministria e Shëndetësisë, Agjensioni për Produkte dhe Pajisje Medicinale, në bashkëpunim me OFK-në kanë dhënë dhjetë rekomandime në lidhje me këtë çështje.

Këto janë rekomandimet:

1. Para se të fillohet puna me pacientë të bëhet organizimi i barnatores, pastrimi dhe dezinfektimi.

2. Të përdoren në mënyrë obliguese dorëzat nga personeli në barnatore.

3. Në rast se ndonjë pacient i dyshuar ka qëndruar në barnatore, vendi duhet të dekontaminohet.

4. Të vendoset rendi ashtu që të jenë të përcaktuar qartë distanca në mes të personelit dhe pacientëve/qytetarëve.

5. Qytetarët të kenë kujdes që të mos qëndrojnë gjatë në barnatore pasi edhe vetë pritjet e gjata në barnatore mund të jenë burim i infeksionit dhe rrezikojnë edhe personelin në barnatore.

6. Të mos lejohet më shumë se një person brenda barnatores ose shërbimi të bëhet përmes dritareve të kujdestarisë.

7. Barnatoret të tentojnë të mbajnë stoqe adekuate të produkteve medicinale duke i këshilluar qytetarët që ata të mos bëjnë furnizime afatgjata në shtëpitë e tyre e më tej t’u mbesin si mbeturina medicinale për shkak të kushteve jo-adekuate të ruajtjes apo pas skadimit.

8. Barnatoret duhet të jenë të hapura përveç në rast se vendoset ndryshe nga Qeveria.

9. Personeli në barnatore si edhe profesionistët e tjerë shëndetësorë obligohen të jenë në detyrë përveç në rastet kur të dy bashkëshortët janë profesionistë shëndetësorë, njëri mund të lirohet n ga detyra.

10. Në rast se paraqitet ndonjë rast i dyshuar të merren masat e izolimit dhe të ndiqen këshillat sipas udhërrëfyesve të shpërndarë nga OFK.

“Duke i respektuar këto masa, ne jo vetëm që mbrojmë njëri –tjetrin, por gjithashtu edhe kontribuojmë në parandalimin e përhapjes së sëmundjes”, thuhet në komunikatë.

commentFirst article
Sot mund të lexoni Shfletoni kopertinat