Klina është njëra prej komunave të prekura me Covid-19, i shkaktuar nga virusi Korona.
Një qytetare e kësaj komune, e cila ka ardhur nga Italia me datën 8 mars, ka dalë pozitive në testet për këtë sëmundje ngjitëse.
Lidhur me gjendjen atje ka folur vet kryetari i komunës, Zenun Elezaj.
Ai nuk e ka përjashtuar mundësinë që në qytetin që ai udhëheqë të ketë edhe raste të tjera të reja me Koronavirus.
“Situata është e qetë momentalisht. Por, duke e ditur afatin për inkubim duhet 14 ditë të pritet. E diagnostikuara nga Italia ka ardhë me datën 8 mars në Kosovë. Mund të ketë raste tjera. Gjasat ekzistojnë”, u shpreh ai.
Ministria e Shëndetësisë, dy ditë më parë, dërgoi në Klinë një kontingjent me dorëza dhe maska.
Por, ky kontigjent po del të jetë i pamjaftueshëm.
Personeli shëndetësor atje, sipas Elezajt, po përballet me mungesë të këtyre mjeteve dhe barnave esenciale.
“Mungesat janë kryesisht në listën e barnave esenciale, që nuk i kemi, uniforma mbrojtëse për stafin shëndetësor, maska, dorëza dhe rroba. Pastaj mungesë të respiratorëve. Ministria e Shëndetësisë e ka dërguar një kontingjent para dy ditë, dorëza e maska, jo diçka tjetër. Ky kontingjent nuk është aspak i mjaftueshëm. Ne jemi shpallë komunë karantinë dhe nuk mund të lëvizim dikah tjetër. Ne shpresojmë që Ministria do t`i sigurojë këto mjete”, u shpreh Elezaj.
Sot në Kosovë janë diagonostifikuar edhe katër raste të reja me Koronavirus, duke e çuar në 13 numrin e të infektuarve.
Të dielën, Qeveria e Kosovës ka shpallur emergjencë shëndetësore.
