Partitë opozitare në Lipjan, Partia Demokratike dhe Lëvizja Vetëvendosje, kanë akuzuar kryetarin e kësaj komune, Imri Ahmeti, se ka ndikuar politikisht për të ngritur në pozitë djalin e tij, për të marrë funksionin e ushtruesit të detyrës së Shefit të Zyrës Ligjore në Ndërmarrjen Publike të Ujësjellësit “Prishtina”.
PDK-ja, përmes një komunikate, për media ka thënë se kryetari Ahmeti edhe një herë po e dëshmon se “nuk e ka hallin e qytetarëve, por hallin e rehatimit të familjarëve”.
“Skandalet në arsim, skandalet në shëndetësi, skandalet në ndërtime, skandalet në drejtësi tregojnë më së miri se si një kryetar i quajtur ‘jurist’ mendon vetëm për punësimin e familjarëve dhe militantëve të vet. Deri sa vendi ynë ballafaqohet me akuza, për luftën e drejtë çlirimtare, kryetari i komunës se Lipjanit e ka gajlen si ta avancoje djalin e tij në pozita, sepse ky njeri edhe në kohen e luftës së UÇK-së është munduar të rehatoje veten dhe të afërmit e vet”, thuhet në komunikatën e PDK-së.
Ndërkaq, Albulena Kelmendi, kuvendare në KK të Lipjanit nga radhët e LVV-së, përmes një reagimi ka thënë se në Kosovë që nga paslufta, “fenomeni i punësimeve partiake e familjare është bërë përditshmëri”.
“Pra, bëhet fjalë për zyrtarë të lartë shtetërorë, të cilët natyrshëm punësojnë, ose bëhen sebep për punësimin e familjarëve e militantëve. Kësisoj, lajmi për punësimin e djalit të kryetarit të komunës së Lipjanit, Imri Ahmeti në pozitë udhëheqëse në institucionin përkatës publik, nuk e habitë askënd. Pavarësisht trumbetimeve për luftim të korrupsionit e qeverisje të drejtë, dukuria e punësimeve në baza nepostiste e partiake e ka karakterizuar ndër vite e qeverisjes së z. Ahmeti”, ka kritikuar Kelmendi.
Sipas saj, “fenomeni i punësimeve të tilla, kur kriter kryesor bëhet afërsia me njerëzit në pushtet, e asnjëherë në bazë të meritokracisë, është ndër dëmtimet më të mëdha që i bëhet vendit”.