15 vjeçari i cili u qëllua për vdekje mbrëmjen e së hënës në pyllin e fshatit Gradicë të Drenasit, do të varroset sot.
Plagë të rënda mori edhe Bekim Muja, babai i 15 vjeçarit.
Muja që nga e hëna në mbrëmje ndodhet në Qendrën Klinike Universitare të Kosovës (QKUK), duke marrë trajtimin e duhur mjekësor.
Shefi i Klinikës Intensive në QKUK, Shaqir Uka tha se gjendja e pacientit vazhdon të jetë e njejtë.
“Vazhdon të jetë në gjendje shumë të rëndë, është i lidhur për aparatë të frymarrjes dhe me barna. Ka lëndime shumë serioze, nuk ka as edhe një ndryshim”, ka thënë Uka.
Motivet e vrasjes nuk dihen ende, as nga organet e rendit, e as nga familjarët e viktimës.
Hetuesit policorë në koordinim me Prokurorinë po vazhdojnë punën hetimore për zbardhjen e plotë të motiveve dhe rrethanave të kësaj ngjarjeje.
