​Nesër në shkollë edhe mësimdhënësit me sëmundje kronike dhe shtatzënat ?

Kosova

​Nesër në shkollë edhe mësimdhënësit me sëmundje kronike dhe shtatzënat ?

Më: 26 shtator 2021 Në ora: 11:44
Foto ilustrim

Nesër do të fillojë procesi mësimor në formë fizike në nivelin parauniversitar në Kosovë. Për SBAShK-un shqetësim është mungesa e mundshme e mësimdhënësve me COVID-19 dhe ata me sëmundje kronike, por edhe e shtatzënave që me vendim të Qeverisë janë të liruara nga paraqitja në punë. Ndërkohë, nga niveli qendrorë është thënë se i gjithë stafi duhet të kthehet në shkolla që nga e hëna.

E derisa mësimi pritet të mbahet në grupe në klasat që kanë më shumë se 20 nxënës, sipas të dhënave të Sindikatës së Bashkuar të Arsimit, Shkencës dhe Kulturës, 93.6% e mësimdhënësve janë të vaksinim së paku me njërën dozë të vaksinës.

Kurse, një pjesë e tyre e ka kryer COVID-19 dhe janë të imunizuar për disa muaj.

Nënkryetari i Sindikata e Bashkuar e Arsimit, Shkencës dhe Kulturës, Ymer Ymeri, në një prononcim për KosovaPress, tregoi se i mbështesin masat e Qeverisë në lidhje me procesin mësimorë, i cili do të fillojë nga dita e hënë.

Megjithatë, sipas tij, shqetësim janë mungesa e mundshme e mësimdhënësve.

Ymeri: Ne si SBASHK e mbështesim vendimin e Qeverisë

“Ne si SBASHK e mbështesim vendimin e Qeverisë me propozim të Ministrisë së Shëndetësisë për fillimin e vitit të ri shkollor me një humbje prej 18 ditëve mësimore nga mënyra e paraparë si fillim i vitit të ri shkollor, por sa janë shkollat e përgatitura ndoshta e kisha nda në dy pjesë, në pjesën për përgatitje teknike të shkollave, të objekteve shkollore dhe pjesa tjetër sa janë të përgatitur me staf mësimorë, ndoshta edhe me shpërndarje të teksteve, tek pjesa e parë për objektet shkollore mund të them se janë të përgatitura siç kanë qenë edhe çdoherë tjetër të përgatitura, edhe mund të them se janë me kushte të plotësuara për fillimin e vitit të ri shkollor. Kemi dyshimin që në anën tjetër drejtoritë e arsimore ndoshta nuk janë të përgatitur të cilët mund të paraqitet mungesa e tyre me rastin e fillimit të vitit shkollor, kryesisht ditën e hënë, siç janë mësimdhënëset shtatzëna, të cilët janë të liruar me vendimin e Qeverisë për paraqitjen në vendin e punës, pastaj kemi pjesën tjetër të mësimdhënësve të cilët janë të infektuam gjatë këtyre ditëve me COVID-19, pjesa tjetër e mësimdhënësve që kanë sëmundje kronike por edhe një pjesë e mësimdhënësve, meqenëse është fushatë zgjedhore, dhe një pjesë e mësimdhënësve janë nëpër listat zgjedhore për zgjedhjet lokale”, ka deklaruar Ymeri.

Ai shton se 93.6% e mësimdhënësve janë të vaksinuar të paktën me një dozë të vaksinës.

Ymeri: 93.6% e mësimdhënësve kanë qenë të vaksinim

“Të dhënat tona tregojnë se 93.6% e mësimdhënësve me ditën e djeshme kanë qenë të vaksinim së paku me njërën dozë të vaksinës, këtij numri i shtojmë edhe numrin që brenda 5 muaj kanë qenë pozitiv me COVID të cilët nuk kanë pas obligim për gjashtë muaj me marrë vaksinën rritet numri i përqindjen deri në 95%, duke e marrë parasysh që edhe ata mësimdhënës që kanë kalu edhe e kanë një test negativ për muaj edhe ata janë të lejuar me ardh në shkollë,” ka shtuar ai.

Edhe drejtori i Asociacionit të Komunave të Kosovës, Sazan Ibrahimi mbështet masat e marra në nivelin qendrorë, ku këtu hyn edhe fillimi i procesit mësimorë.

Ibrahimi: Të gjitha komunat janë duke i zbatuar masat

“Të gjitha komunat janë duke i zbatuar në plotni masat të cilat jemi dakorduar me nivelin qendrorë dhe fillimi i zbatimit të tyre do të bëhet që nga e hëna. Neve si Asociacion kemi kërkuar që procesi mësimor më prani fizike të filloj nga kjo e hënë dhe jemi dakorduar edhe me nivelin qendrorë që kjo do të ndodhë. Mirëpo nëse në një klasë ka më shumë se 20 nxënës, atëherë mësimi do të zhvillohet në dy grupe. Gjithashtu, kemi ngritur shqetësimin rreth mësimdhënëseve shtatzëna dhe mësimdhënësve të cilët kanë sëmundje kronike, mirëpo nga niveli qendrorë është thënë që i gjithë stafi duhet të kthehet në shkolla që nga e hëna, d.m.th edhe mësimdhënëset shtatzëna, mirëpo edhe mësimdhënësit të cilët kanë sëmundje kronike, duhet të kthehen patjetër në shkolla. Mirëpo qasjen në objekte mund ta bëjnë nëse janë të vaksinuar apo nëse kanë testin PCR negativë”, ka thënë ai.

Shpresa Shala, drejtoreshë e arsimit në komunën e Prishtinës, për KosovaPress, tha se shkollat teknikisht janë gati.

Shala: Teknikisht shkollat janë gati

“Sipas informatave dhe vizitave që i kemi bërë në të gjitha shkollat dhe furnizimet që i kemi bërë në të gjitha shkollat, teknikisht shkollat janë gati. Gjithashtu, dje jemi njoftu që kanë mbajt mbledhjen me taks forcën, është vendos për mënyrën e skenarit, d.m.th pjesë e fshatrave ku ka nxënës më pak, do të mbahet ora 40 minuta, ku do të kthehen të gjithë nxënësit në shkollë. Kurse pjesës së qytetit sipas skenarit të ri A, ora do të jetë nga 30 minuta me dy grupe në një klasë”, ka deklaruar ajo.

E ministri i Shëndetësisë, Arben Vitia ka paralajmëruar se vazhdimisht do të bëhen testime të nxënësve dhe mësimdhënësve.

Vitia: Do të bëhen testime të nxënësve dhe mësimdhënësve

“Vazhdimisht do të bëhen testime të nxënësve dhe mësimdhënësve nëpër shkolla, por kryesisht nëpër shkolla ku ka më tepër nxënës sepse natyrisht aty edhe mundësia e madhe e shpërndarjes së infeksionit”, ka thënë ai.

Ndërkohë, mediat kanë raportuar se organizatorët e protestave në veri të vendit, kanë vendosur që mos ta fillojnë procesin mësimor këtë hënë, më 27 shtator.

Ky vendim që pritet të publikohet së shpejti ka për qëllim në radhë të parë propagandistik, duke e paraqitur situatën të rënduar për fëmijët serbë.

Kurse, arsyeja themelore është që t’i mbajnë mësimdhënësit si pjesë e protestuesve.

commentFirst article
Sot mund të lexoni Shfletoni kopertinat