Lëvizja Vetëvendosje ka mbajtur një konferencë lidhur me ndryshimin e kufijve-ndërkomunal mes Fushë Kosovës dhe Graçanicës, ku kjo e fundit ia ka dhënë Fushë Kosovës fshatin Uglar dhe Zonën Kadastrale të Prejocit.
Deputetja e Vetëvendosjes dhe kryetarja e degës së Vetëvendosjes në Fushë Kosovë, Albana Gashi, ka thënë se ky vendim i dy Kuvendeve Komunale (Graçanicë dhe Fushë Kosovë) është anti-kushtetues.
“Vendimi i datës 15 shtator 2018 i Kuvendit Komunal të Graçanicës dhe vendimi i sotëm i Kuvendit Komunal të Fushë Kosovës konsiderohen të jenë jashtë kompetencës, të kundërligjshme dhe anti-kushtetuese”.
“Ky vendim është në kundërshtim me ligjin aktual sepse ligji shprehimisht këto Zona Kadastrale ua njeh komunave përkatëse”.
“Njejtë edhe Kushtetuta e parasheh ndryshimin e kufijve përmes ndryshimeve ligjore. Kufijtë administrativë mund të ndryshohen vetëm nga Kuvendi i Kosovës. Është në kundërshtim me Kushtetutën sepse Kushtetuta përcakton se kufijtë e komunave mund të ndryshohen vetëm me Ligj, respektivisht me plotësim-ndryshimin e Ligjit për Kufijtë Administrativ”.
“Procesi si erdhi deri te ky vendim i paligjshëm është po ashtu edhe i paprecedent, me nxitim, pa shpjegime, i parregulltë, pa konsultime me qytetarë dhe jashtë kompentencave të nivelit komunal”.
Gashi ka akuzuar kryetarin e Fushë Kosovës, Burim Berishën, për ndikim mbi asambleistët lidhur me këtë vendim.
“Brenda dy ditësh, komuna e Fushë Kosovës përcolli dokumentet e këtij vendimi të jashtëligjshëm, thirri mbledhje të Komiteteve të Kuvendit Komunal, ku edhe vet kryetari i komunës ishte pjesëmarrës në këtë mbledhje”.
“Kryetari i Komunës, Burim Berisha, nuk merr pjesë në asnjë seancë të Kuvendit Komunal derisa dje për të bërë presion tek asambleistët, ka marrë pjesë në mbledhjen e Komitetit për Financa”.
“Ky vendim ka kaluar në seancën e sotme dhe është votuar nga asambleistët e LDK-së, në përjashtim të një asambleisteje, AKR-së, PD-së dhe minoritetet e tjera”.
“Në Kuvendin e Graçanicës, ka qenë vetëm asambleisti Nenad Rashiq që ka votuar kundër këtij vendimi”.
