Presidenti Hashim Thaçi dekoroi sot në ceremoni të ndara Loris Castriota Skanderbegun, Reto Nausen dhe Gjon Berishën me Medaljen e 10-vjetorit të Pavarësisë, në shenjë falënderimi për kontributin në promovimin e Kosovës dhe për angazhimin për ruajtjen, kultivimin dhe promovimin e vlerave shqipe.
Pasardhësin e familjes së heroit kombëtar Gjergj Kastrioti – Skënderbeu, Loris Castriota Skanderbegun, presidenti Thaçi e ka falënderuar për mishërimin me vlerat, traditat, historinë shqiptare dhe angazhimin e tij për ruajtjen, kultivimin dhe promovimin e këtyre vlerave.
Ndërsa, politikanit zviceran Reto Nausen i ka shprehur mirënjohje për kontributin në promovimin e Kosovës në Zvicër dhe për përkrahjen e dhënë për komunitetin kosovar atje.
Ndërkaq, veprimtarin Gjon Berisha e ka falënderuar për përkrahjen e përhershme në diasporë për të gjithë shqiptarët, nga të gjitha trojet shqiptare, para dhe pas luftës.
Të dekoruarit falënderuan presidentin Thaçi për vlerësimin e aktiviteteve të tyre dhe për nderimin që po i bën Republika e Kosovës.