Ministri i Shëndetësisë, Uran Ismaili, ka njoftuar sot Komitetin Drejtues të Projektit për Shëndetësinë për rikonstruktimin e projektit, i cili është bërë me qëllim të adaptimit të aktiviteteve, bazuar në kapacitetet absorbuese të Ministrisë së Shëndetësisë, përkatësisht Fondit të Sigurimeve Shëndetësore.
Projekti i Shëndetësisë është projekt i Qeverisë së Kosovës, i financuar nga huamarrja e Bankës Botërore dhe synon përkrahjen e themelimit të shtyllave kryesore për themelimin e Fondit të Sigurimeve Shëndetësore dhe forcimin e kujdesit parësor shëndetësor.
“Ne jemi në proces të finalizimit të rishikimit të Ligjit për Shëndetësi dhe Ligjit për Sigurime Shëndetësore që do të mundësojnë funksionalizimin e Fondit të Sigurimeve Shëndetësore, duke përfshirë këtu dhe skemën e barnave jashtë-spitalore”, tha ministri Ismaili.
Përfaqësuesi i Bankës Botërore Diego Garrido Martín, tha se mbajtja e këtij takimi është shenjë e qartë e trendit pozitiv në të cilin do të shkojë projekti i shëndetësisë vendore.
“Këtë rikonstruktim e shohim si trajektore shumë pozitive, prandaj Banka Botërore qëndron gati për të ju mbështetur në çfarëdo mënyre që mundet. Sektori shëndetësor është çelësi për zhvillimin e Kosovës dhe do të jemi pranë jush”, ka thënë ai.
Koordinatorja e projektit, Fatime Arenliu - Qosaj, tha se ishte me shumë rëndësi që Komiteti Drejtues, në kuadër të detyrave të veta, u zotua që ta intensifikojnë dinamikën e implementimit të projektit, në mënyrë që të arrihen të gjitha rezultatet e parapara, me qëllim të përmirësimit të shërbimeve shëndetësore për qytetarët.
Ndryshe, Projekti i Shëndetësisë është bërë efektiv në maj të vitit 2015 dhe pritet të përfundojë në tetor të vitit 2019.