Zëvendësministri i Qeverisë Haradinaj sot paraqitet në gjykatë

Kosova

Zëvendësministri i Qeverisë Haradinaj sot paraqitet në gjykatë

Më: 29 nëntor 2018 Në ora: 07:36
Bujar Nerjovaj

Bujar Nerjovaj, Zëvendësministër i Administratës Publike, do të paraqitet sot në Gjykatën Themelore Prizren për t’u përballur me akuzat për keqpërdorimit të pozitës apo autoritetit zyrtar.

Nerjovaj akuzohet për periudhën sa e kryente funksionin e Drejtorit të Drejtorisë Komunale të Inspektoratit në Prizren,

Gjyqtari i rastit Xheladin Osmani, ka caktuar datën e sotme si datë për mbajtjen e shqyrtimit fillestar.

Sipas aktakuzës e ngritur nga Prokuroria Themelore Prizren, të cilën e përfaqëson prokuroja Metush Biraj, ish – drejtori Bujar Nerjovaj si person zyrtar me mosveprim duke shfrytëzuar pozitën apo autoritetin zyrtar, nuk e ka përmbushur detyrën e tij zyrtare, me qëllim të përfitimit të dobisë pasurore, për vete apo për dikë tjetër, raporton kallxo.

Në aktakuzë përshkruhet Nerjovaj në vazhdimësi në periudhën kohore 05.12.2011 e deri më 21.02.20013, pasi që është njoftuar me konkluzionet e inspektorëve të ndërtimtarisë, nuk i ka ndërmarrë masa për t`i siguruar kushtet adekuate për ekzekutimin e konkluzionit të inspektorëve.

Sipas aktakuzës ish-drejtori Bujar Nerjovaj, në bazë të këtyre konkluzioneve të inspektoratit, është dashur të bëjë rrënimin e detyrueshëm të mbindërtimit në objektet hoteliere si në vijim: Hotel ”Shadërvan”, Hotel ”Classic”, “Hotel” Centrum” (të gjitha këto me mbindërtime ) si dhe rrënimi i Hotel ”Kaqinari” (sipas aktakuzës i ndërtuar pa leje) të gjitha në Prizren, si dhe objektet hoteliere në fjalë, të gjitha me lokacion gjenden në Zonën e parë të Qendrës Historike në Prizren.

Zëvendësministri i Administratës Publike, Bujar Nerjovaj e ka quajtur të pakuptimtë, aktakuzën e ngritur ndaj tij nga Prokuroria Themelore në Prizren – Departamenti i Krimeve të Rënda, për veprën penale keqpërdorim i detyrës zyrtare, në kohën sa ishte drejtor i Drejtorisë Komunale të Inspektorateve në Prizren.

commentFirst article
Sot mund të lexoni Shfletoni kopertinat