Në Prishtinë po mbahet konferenca e tetë vjetore e gjyqësorit, ku po diskutohet rreth pavarësisë, transparencës dhe llogaridhënies në këtë sektor.
Kryetar i Këshillit Gjyqësor të Kosovës, Nehat Idrizi, ndër tjerash deklaroi se ky vit ka qenë sfidues për ta.
“Kemi bërë rekrutimin e një numri të gjyqtarëve dhe të gjitha pozitat e lira janë plotësuar”.
“Kur jemi tek Veriu, gjyqësori nuk bartet me sfida, por sfida në Veri është komunikimi me një gjuhë si për palët ashtu edhe për gjykatësit, sepse herë- herë duhet të paguajmë përkthyes, por besojmë në angazhimin e 15 përkthyesve që do t’i shërbejnë gjykatës”, u shpreh ai.
Ndërkaq i pyetur nga mediat se a janë prezentë edhe gjykatësit e veriut, ai u deklarua se nuk i kishte parë, e që në fakt, kryetari i gjykatës themelore në Mitrovice, Nikolla Kabashiq, mungonte në këtë konferencë.
Gjatë këtij takimi, Ministri Abelard Tahiri lavdëroi punën e gjyqësorit, pasi sipas tij po rritet efektshmëria çdo herë e më shumë. Ai u shpreh se edhe ministria po e kryen punën ashtu siç duhet duke i plotësuar të gjitha nevojat që ka gjyqësori në aspektin e ligjeve dhe se do të vazhdojnë me këmbëngulje t’i trajtojnë të gjitha shqetësimet e gjyqësorit që të jetë sa më i pavarur.
Ndërsa kryetari i gjykatës supreme, Enver Peci, deklaroi: “Po na thonë që gjyqësori është kushti i fundit për liberalizim të vizave, por ne i kemi kryer të gjitha obligimet, megjithëse nuk punojmë vetëm për çështjen e liberalizimit, por për gjithë qytetarët e Kosovës që të kenë një sistem të drejtësisë sa më të efektshëm dhe më të pavarur”.
Punimet e kësaj konference pritet të vazhdojnë gjatë gjithë ditës.