Gjatë këtij viti në institucionin e Avokatit të Popullit janë paraqitur ankesa të shumta, që si shkak kanë pasur të drejtat ekonomike shëndetësore dhe sociale.
Avokati i Popullit, Hilmi Jashari, tha se institucioni të cilin ai e udhëheqë, është radhitur si institucioni më i besueshëm në Kosovë.
Jashari ka vlerësuar se këtë vit Avokati i Popullit ka pasur zhvillime pozitive, ku njëri ndër ta sipas tij është interesimi i institucioneve të tjera që të zbatojnë rekomandimet e dala nga Avokati i Popullit.
Jashari tha se këtë vit ka pasur rritje të numrit të personave që kanë parashtruar ankesa, ku sipas tij, numri i tyre është rreth 5200.
Rastet e zgjedhura sipas Jasharit po ashtu kanë shënuar rritje për 32 për qind, ndërsa thotë se 28 për qind kanë shënuar rritje edhe zbatimi i rekomandimeve të Avokatit të Popullit.
Edona Hajrullahu, zëdhënëse e Avokatit të Popullit, tha se në bazë të ankesave të paraqitura 98 për qind janë shqiptarë, ku në numër më të madh janë meshkuj.
"26 për qind u janë drejtuar gjykatave, 15 komunave, 7 policisë. 40 ankesa pra u janë drejtuar ekzekutivit" ka thënë ajo.
Hajrullahu theksoi se gjatë këtij viti, kanë lansuar edhe videospote vetëdijesuake rreth respektimit të të drejtave të njeriut.