Në dy operacione të ndara të zhvilluara dje dhe sot nga ana e njësisë rajonale për hetimin e krimeve në kuadër të Drejtorisë Rajonale të Policisë së Prishtinës, janë arrestuar dy persona të dyshuar për një rast të shantazhit, ndërsa është në kërkim edhe të personit të tretë, i cili është i njohur për policinë.
Këto operacione kanë ardhur si rrjedhojë e një denoncimi që viktima e rastit ka bërë pranë policisë disa ditë më parë.
Nga hetimi preliminar që policia i ka bërë këtij rasti, është ngritur baza e dyshimit se të dyshuarit për një periudhë të caktuar kohore duke shantazhuar viktimën me publikimin e disa fotografive eksplicite, kanë ndikuar tek ajo që përkundër vullnetit të marrin shuma të konsiderueshme të parave.
Me këtë rast janë arrestuar S. L, mashkull, 19-vjeç, shtetas i Kosovës dhe A. H, mashkull, 22-vjeç, shtetas i Kosovës, të cilët me rekomandim të prokurorit të shtetit janë dërguar në qendrën e mbajtjes prej 48 orësh për vazhdimin e mëtejmë të hetimeve.
I dyshuari i tretë, Sh. Ç, i njohur për policinë, aktualisht është në arrati dhe polica bashkërisht me prokurorin e shtetit po koordinon veprimet e nevojshme për kapjen e tij.
