Një plagosje me armë zjarri ka ndodhur sonte rreth orës 19 në një pompë derivatesh në magjistralen Prishtinë-Pejë.
Rastin e ka konfirmuar zëdhënësja e Policisë së Kosovës për rajonin e Prishtinës Flora Ahmeti për gazetën “Bota sot”.
Ahmeti ka treguar se pas të shtënave me armë zjarri në drejtim të viktimës, personat e dyshuar janë larguar nga vendi i ngjarjes.
“Rreth orës 19:00 kemi pranuar informatën se një person është i plagosur në rrugën Prishtinë -Pejë, saktësisht në një pompë derivatesh. Menjëherë në vendngjarje kanë dalë njësitet e nevojshme policore dhe bazuar në hetimet fillestare dyshohet se pas të shtënave me armë zjarri në drejtim të viktimës, personat e dyshuar janë larguar nga vendi i ngjarjes”, ka thënë Ahmeti.
Sipas policisë, viktima është dërguar në trajtim mjekësor, ndërsa policia ka identifikuar personat e tyre dhe është në kërkim të tyre.
“Viktima është dërguar për tretman mjekësor, ndërkohë që hetuesit policorë kanë identifikuar personat e dyshuar dhe janë në kërkim të tyre”, ka thënë zëdhënësja e PK-së për “Bota sot”.